8.1 их наядын төсөвтэй метроны төслийн ард нуугдсан Т.Даваадалайн ашиг сонирхол

Нийслэлчүүдийн зовлон дээр зоолдог дарга олширчээ. Ах дүүс, амраг садан, үр хүүхэд, үеэл хаяалтайгаа хамтраад хулгай хийх нь гэм биш болсон байна.

Нийслэлийн Засаг даргын Эдийн засгийн хөгжил, дэд бүтцийн асуудал хариуцсан нэгдүгээр орлогч Т.Даваадалай болон түүний эхнэр, төрсөн дүүтэй нь холбоотой ашиг сонирхол, авлига, хулгай байж болзошгүй баримтыг SaveTUUL хөдөлгөөнийхөн ил болголоо.

“Бодь”-ийн Д.Баясгалангийн нийслэлд тавьсан бэт гэгдэх Т.Даваадалай НИТХ-ын төлөөлөгчөөр сонгогдохдоо буюу 2024 оны ХОМ-тээ “Анка урбан инженеринг энд дизайн” ХХК-ийн хувьцаа эзэмшигч болохоо бичсэн байна.

Тус компани нь түүний эхнэр Б.Анхтуяагийн нэр дээр байдаг, 2021 онд хүнд машин механизмын худалдаа, бизнесийн зөвлөгөө өгөх, төсөл хэрэгжүүлэх, цэцэрлэгжүүлэлт гэсэн үйл ажиллагааны чиглэлээр байгуулсан компани аж. Б.Анхтуяа 2024 оны 10 дугаар сар хүртэл компанийхаа гүйцэтгэх захирлаар ажилласныг ЭНД-ээс харж болно.

Т.Даваадалай 2024 оны 10 дугаар сарын 15-ны өдөр Нийслэлийн Засаг дарга Х.Нямбаатарын нэгдүгээр орлогчоор томилогдсон даруйдаа буюу 10 дугаар сарын 16-ны өдөр компанийнхаа гүйцэтгэх захирлаар Н.Билгүүнийг томилж, эцсийн өмчлөгчөөр бүртгүүлжээ. Үүнийхээ дараа “Анка урбан инженеринг энд дизайн” компанийнхаа нэрийг “Авангард уран дизайн энд инженеринг” болгон өөрчилж, 8 их наяд 174 тэрбум, 309 сая төгрөгийн төсөвт өртөгтэй метро барих төслийн тендерт оролцсон байна.

Тодруулбал, 2026 онд “Улаанбаатар метро төслийн барилга угсралтын гүйцэтгэгчийг шалгаруулах II шатны багц 1” тендерт оролцож буй агаад тендерийн ялагчийг 2026 оны 7 дугаар сарын 03-ны өдөр тодруулна.

Тэрчлэн “Улаанбаатар метро” төслийн менежерээр Т.Даваадалайн төрсөн дүү Т.Мөнхдалай ажиллаж байна. Ах нь бодлого, мөнгийг барьдаг, дүү нь төслийг удирддаг байхад тендерт хэний компани шалгарах нь нэн ойлгомжтой.

Т.Мөнхдалай хэвлэлд “Хотын дарга надтай холбогдож, эх орондоо ажиллах санал тавьсан” гэж ярьсан байдаг. Угтаа хотын дарга Х.Нямбаатар түүний төрсөн ахыг өөрийнхөө орлогчоор томилогдож байгааг ч мэдэж байсан.

Хэдийгээр тендерийн эцсийн дүн гараагүй байгаа ч Т.Даваадалайн энэ үйлдэл зөвхөн ашиг сонирхлыг зөрчлөөр хязгаарлагдах зүйл биш. Эрүүгийн хуулийн 22.1 буюу Эрх мэдэл, албан тушаалын байдлаа урвуулан ашиглах гэмт үйлдлийн бүх нөхцөл үүссэн гэхэд буруудахгүй. Нөгөө талдаа шударга өрсөлдөөнийг хааж боомилсон гэмт хэрэг ч болно. Төрийн албаны хууль тогтоомжийг зөрчсөн үйлдэлд бас тооцогдох ёстой.

Ийнхүү нийслэлийн дарга нар нийтийн албыг хувийн хөрөнгөжих хэрэгсэл болгосоор байхад хууль хүчнийхэн чимээгүй хараад суусаар байх уу.