АНУ-ын цагаачлалын виз олголтоо түр зогсоосон 75 орны жагсаалтад Монгол багтжээ

АНУ визийн хяналтаа чангатгах үүднээс тодорхой хүрээнд арга хэмжээ авч эхэллээ. Тодруулбал нийт 75 улсын иргэдэд иммигрант виз (байнгын оршин суух цагаачлалын виз) олгох үйл явцыг 2026 оны 1-р сарын 21-нээс хязгаарлахаар шийдвэрлэсэн байна. 75 орны жагсаалтад Монгол Улс багтжээ.

Цагаачлалын визийн хориг нь түр хугацаагаар хэрэгжинэ гэж буй ч хэдий хугацаанд үргэлжлэх талаарх албан ёсны дэлгэрэнгүй мэдээлэл хараахан гараагүй байна.

АНУ нь цагаачлал, аюулгүй байдлын бодлогоо илүү чангатгаж буй нь олон улсын геополитикийн нөхцөл байдалтай холбоотой байж болзошгүй юм.

Цагаачлалын виз (Immigrant visas) гэдэг нь АНУ-д байнга амьдрах, ногоон карт авах зорилготой виз. Ийм виз нь гэр бүлийн цагаачлал, Америк иргэн/ногоон карттай хүний эхнэр, нөхөр болох, ажил олгогчоор ивээн тэтгүүлдэг виз EB-1, EB-2, EB-3 зэрэг (байнгын ажил, байнга оршин суух), Diversity Visa (Green Card Lottery), Refugee / Asylumт олгогддог виз аж.

Мөн цагаачлалын бус виз олголтод тавих шаардлага ч чангарч магадгүй бололтой. Үүнд ажлын түр хугацааны, аяллын болон тус улсад сурах визүүд багтаж байгаа юм.