Цагаан ордны гаднах буудалцаан

Дональд Трампыг Ерөнхийлөгчийн ордонд байх үеэр олон арван буун дуу сонсогдсон тухай гэрчүүд мэдээлэв.

The Financial Times

Цагаан ордны гадна АНУ-ын Нууц албаны агентууд руу гал нээсэн сэжигтнийг хууль сахиулагчид устгажээ. Бямба гаригийн 18:00 цагийн үед нэгэн эрэгтэй шалган нэвтрүүлэх цэгт дөхөж ирээд "цүнхнээсээ зэвсэг гаргаж ирэн гал нээж" эхэлсэн бөгөөд цагдаа нар хариу гал нээсэн байна. Энэ тухай АНУ-ын Нууц албаны хэвлэлийн төлөөлөгч Энтони Гульелми мэдээлэв. Түүний хэлснээр сэжигтнийг орон нутгийн эмнэлэгт хүргэсэн боловч нас барсан байна.

Буудалцааны үеэр хууль сахиулах байгууллагын ажилтан бэртэж гэмтээгүй ч хөндлөнгийн нэгэн иргэн суманд өртөж шархадсан байна. Тэрхүү иргэний биеийн байдал тодорхойгүй байгаа бөгөөд сэжигтний болон цагдаагийн аль суманд өртсөн болох нь хараахан тогтоогдоогүй байна.

Хэрэг гарах үед Цагаан ордны нутаг дэвсгэрт байсан сурвалжлагч нарт 30 орчим удаа буун дуу сонсогдсон бөгөөд Нууц албаны агентууд тэднийг яаралтай дотогш оруулсан тухай мэдээлсэн юм. Гульелми АНУ-ын Ерөнхийлөгч Дональд Трампыг хэрэг гарах үед Цагаан ордон дотор байсан бөгөөд бэртэж гэмтээгүй гэдгийг баталжээ. Трамп энэ явдлын талаар нэн даруй мэдэгдэл хийгээгүй байна. Хэрэг явдлаас хоёр цагийн дараа Цагаан ордны Хэвлэл мэдээллийн албаны дарга Стивен Чун олон нийтийн сүлжээндээ ерөнхийлөгч Цагаан ордонд үргэлжлүүлэн ажиллаж байгааг дурдаад, "Үл зогсоно, зогсох ч үгүй" гэж бичжээ.

Цагдаа болон Үндэсний гвардийнхан буудалцаан болсон газрын эргэн тойрон дахь гудамжуудыг бүсэлсэн байна. Вашингтоны Төв Колумбын тойргийн цагдаагийн газраас Нууц албаныхан Баруун хойд 17 дугаар гудамж болон Пенсильванийн өргөн чөлөөний уулзварт ажиллаж байгааг мэдээлж, олон нийтийг "тухайн бүс нутгаас хол байхыг" анхааруулав. Уг уулзвар нь Цагаан ордны орц болон хамгаалалтын шалган нэвтрүүлэх цэгтэй тун ойрхон байрладаг байна.

Трамп бямба гаригт бүтэн өдөржин Цагаан ордонд байсан юм. Буудалцаан болохоос хэдхэн цагийн өмнө АНУ-ын ерөнхийлөгч өөрийн "Truth Social" платформдоо Зууван танхимд байгаа тухайгаа болон Иран дахь дайныг бүрмөсөн зогсоож, Хормузын хоолойг дахин нээх хэлэлцээрийг "тун удахгүй зарлах болно" гэж бичсэн байв.

Вашингтон хотын төвд гарсан энэхүү буудалцаан нь Цагаан ордны Сурвалжлагчдын холбооны оройн зоогийн үеэр Трампыг “тайзнаас яаралтай буулгасан” үдшээс хойш сар хүрэхгүй хугацааны дараа болж байна. Тухайн үед нийслэл хотын нэгэн зочид буудлын хамгаалалтын хаалтыг зэвсэгтэй этгээд дайран орж, Нууц албаны агентыг буудсаны дараа баривчлагдсан юм. Корреспондентуудын зоогийн үеэр гарсан уг хэрэг явдал нь 2024 оны 7-р сараас хойш гурван ч удаа амь насанд нь халдахыг завдсан тохиолдолтой тулгараад буй ерөнхийлөгчийг хамгаалах Нууц албаны чадварт эргэлзээ төрүүлээд байна.