Цахиурын хувьсгал: Чипний компаниудын шинэ эрин

Micron Technology компанийн хувьцаа огцом өссөн.

The Wall Street Journal

Ердөө жилийн өмнө хөрөнгө оруулагчид Intel компанийг "дампуурсан" гэж тооцон, ирээдүйгүй болсон гэж үзэж байсан юм. Гэвч өнөөдөр тус чип үйлдвэрлэгчийн хувьцааны ханш босоо шугамаар өсөж, сүүлийн 26 жилийн хугацаан дахь анхны дээд амжилтаа тогтоогоод зогсохгүй, улам бүр дээшлэх болов.

2026 он бол хагас дамжуулагчийн хувьцааны "агуу өсөлт"-ийн үе. Тиймээс чип үйлдвэрлэгчдийн хувьд жинхэнэ таатай, тавтай морилсон цаг үе тохиож байна: Intel-ийн хувьцаа он гарсаар 100 биш бүр 239%-иар өслөө. Sandisk-ийн хувьцааны ханш 558%-аар дүүлэв. Өмнөд Солонгосын хөрөнгийн зах зээлийн гол индекс бараг хоёр дахин өслөө. Харин S&P 500 индекс дэх хагас дамжуулагчийн компаниуд ердөө сүүлийн зургаан долоо хоногийн дотор зах зээлийн үнэлгээгээ $3.8 их наядаар нэмэгдүүллээ.

Энэхүү огцом өсөлтийн гол хөдөлгүүр нь хиймэл оюун ухааны (AI) компаниудын тооцоолон бодох чадварын "цадашгүй" хэрэгцээ юм. Энэхүү хэрэгцээ нь зөвхөн төрөлжсөн чипүүдээр хязгаарлагдахгүй, санах ойн чип болон Intel-ийн уламжлалт төв процессор (CPU) зэрэг бүх төрлийн хагас дамжуулагчийг хамрах болов. Чип үйлдвэрлэгчид саяхан гайхалтай ашиг орлогоо тайлагнаж, ирэх жилийн төлөвөө маш өөдрөгөөр төсөөлж байгаагаа зарласан юм.

Хөрөнгө оруулагчид энэ салбар руу асар их хөрөнгө цутгаж байгаа бөгөөд тэдний дунд "dot-com" хөөсөрхлийн үеийг санаж буй туршлагатай хүмүүс ч цөөнгүй байна. Тэр үед зах зээл асар ихээр хөөрөгдөж байгаад эцэст нь хөөс хагарч, олон хувьцаа “үхсэн” гашуун түүх бий.

Сан-Франциско хотын тэтгэвэрт гарсан хуульч, 64 настай Питер Фейнберг сүүлийн арав гаруй жилийн турш Broadcom болон Taiwan Semiconductor Manufacturing Co. (TSMC) компаниудад хөрөнгө оруулалт хийж иржээ. Түүний багц сүүлийн хэдэн жилийн турш S&P 500 индексийн өсөлтөөс илүү ашиг авчирч байсан бол 2026 онд энэхүү ашиг нь зүүдэндээ ч төсөөлж байгаагүй хэмжээнд хүрчээ.

"Цагдаа нар ирж хаахаас ердөө хагас цагийн өмнө парти хамгийн оргилдоо хүрдэг гэдэг ойлголтыг би сайн мэднэ" хэмээн тэрбээр зах зээлийн хэт хөөрөгдлийг болгоомжлон хэлж байна.

Олон жилийн турш хөрөнгө оруулагчдын анхаарал зөвхөн хиймэл оюун ухааны загваруудыг бүтээх, ажиллуулахад ашиглагддаг график процессор (GPU) үйлдвэрлэгчид дээр төвлөрч байсан юм. Харин уламжлалт CPU-үүд мартагдах шахсан билээ. Гэвч энэ оны эхээр Anthropic компанийн хамгийн сүүлийн үеийн AI загвар өөрийн "агентлаг" (agentic) чадвараараа хэрэглэгчдийг гайхшруулснаар хагас дамжуулагчийн салбарын хандлага өөрчлөгдөж эхлэв.

Хиймэл оюун ухааны компаниудын хэрэгцээ хувьсан өөрчлөгдөхийн хэрээр уламжлалт CPU-ийн эрэлт ч даган нэмэгдлээ. AI агентууд 24/7 тасралтгүй ажиллаж, асар их хэмжээний өгөгдөл үүсгэж байгаа нь санах ойн чипний хэрэгцээг ч огцом өсгөсөн юм. Бүх төрлийн чипний хомсдол үүсэж байгаа нь үнийг улам бүр хөөрөгдөж байна.

Janus Henderson-ийн 8 тэрбум долларын технологи, инновацийн сангийн менежер Жонатан Кофски: "Одоо дэлхийн хамгийн баян технологийн компаниуд олж авч чадах бүх л хагас дамжуулагч болон тооцоолон бодох хүчин чадлыг өөрсдийн болгохоор булаалдаж байна. Энэ нь үйлдвэрлэгчдэд урьд өмнө байгаагүй өндөр ашиг авчирч байна" гэж тайлбарлав.

Хувьцааны ханшийн сүүлийн үеийн өсөлтөд чип үйлдвэрлэгчдийн нэгдүгээр улирлын санхүүгийн гайхалтай үр дүн болон ирээдүйн төлөв байдал нь гол түлхэц боллоо. Энэ удаагийн өсөлт нь "dot-com" хөөсөрхлийн үеэс ялгаатай нь компаниудын бодит ашиг орлого дээр суурилж байгаа юм. Тэр үед олон компаниуд ашиггүй байсан ч хувьцаа нь өсөж байсан билээ.

Тухайлбал, санах ойн чип үйлдвэрлэгч Micron Technology компанийн орлого энэ санхүүгийн жилд 107 тэрбум долларт хүрэх төлөвтэй байгаа бөгөөд энэ нь 2023 оны 15.5 тэрбум доллартай харьцуулахад асар их үсрэлт юм. 2023 онд санах ойн үнэ доогуур байснаас тус компани алдагдалтай ажиллаж байсан бол, одоо шинжээчид жилийн үйл ажиллагааны ашгийг 77 тэрбум долларт хүрнэ гэж таамаглаж байна. Учир нь тус компанийн чипний эрэлт нь нийлүүлэлтээсээ хол давжээ.

Хувьцааны ханш нь 770%-иар өссөнөөр Micron компани Америкийн хамгийн үнэ цэнэтэй компаниудын нэг болов. Гэсэн хэдий ч ашиг нь маш хурдтай өсөж байгаа тул уламжлалт үнэлгээний хэмжүүрээр тус компанийн хувьцаа харин ч "хямд" харагдаж байна. Одоогийн байдлаар Micron-ийн хувьцаа ирэх 12 сарын хүлээгдэж буй ашгаас 8.9 дахин их үнээр (P/E ratio) арилжаалагдаж байгаа бол S&P 500 индексийн дундаж P/E харьцаа 23 байна.

Fidelity Investments-ийн тоон зах зээлийн стратегийн захирал Дениз Чишолм: "Одоогийн гол үзүүлэлт бол ашгийн өсөлт өндөр байгаа явдал юм" гэж тэмдэглэв.

Хувь хүн хөрөнгө оруулагчид ч энэ хөдөлгөөнөөс хоцрохыг хүсэхгүй байна. Interactive Brokers платформ дээр өнгөрсөн долоо хоногийн хамгийн их арилжаалагдсан 10 хувьцааны бараг бүгдээрээ чип үйлдвэрлэгчид, тэдгээрийг худалдан авдаг технологийн компаниуд болон чипт суурилсан биржээр арилжаалагддаг сан болох SOXL байв.

SOXL сан нь дериватив ашиглан NYSE хагас дамжуулагчийн индексийн өдрийн өгөөжийг гурав дахин өсгөж эсвэл бууруулж үзүүлдэг. Энэхүү сан сүүлийн нэг жилийн хугацаанд 1,200%-иар өсөж, эрсдэлд дуртай хөрөнгө оруулагчдыг баярлуулж байна. Тэд Reddit болон X (хуучнаар Twitter) дээр өөрсдийн ашгийн зургуудыг (screenshot) бахархан нийтэлсээр байна.

Interactive Brokers-ийн ерөнхий стратегич Стив Сосник: "Хиймэл оюун ухаан нь зах зээлийг, цаашлаад эдийн засгийг бүхэлд нь чиглүүлж байна. Хагас дамжуулагч бол үүний одоогийн илрэл юм. Миний санаж байгаагаар энэ бол хамгийн огцом, босоо өсөлтүүдийн нэг" гэж хэлэв.

Зарим шинжээчид "dot-com"-ын үетэй төстэй байдал улам бүр нэмэгдэж байгааг анхааруулж байна. PHLX Semiconductor индекс сүүлийн зургаан долоо хоногт 2000 оны 3-р сарын 10-наас хойших хамгийн сайн үзүүлэлтээ харууллаа.

Чип үйлдвэрлэгчид хүчин чадлаа нэмэгдүүлэхээр яарч байгаа ч зарим саад бэрхшээлээс болж томоохон хомсдол хэдэн сараар бус, хэдэн жилээр үргэлжилнэ гэж шинжээчид таамаглаж байна. Гэсэн хэдий ч энэ нь мөнхөд үргэлжлэхгүй бөгөөд хөрөнгө оруулагчид хагас дамжуулагчийн салбарын өмнөх "өсөлт-уналын" мөчлөгүүдээс болгоомжилж байгаа юм.

Урт хугацааны тодорхойгүй байдал нь үнэлгээг маш өндөрт гарахад саад болж байна гэж зарим нь үзэж байгаа ч үнэ өдөр бүр нэмэгдсээр байна. Intel компани Apple-тай чип үйлдвэрлэх урьдчилсан гэрээ байгуулсан тухай Wall Street Journal мэдээлсний дараа тус компанийн хувьцаа баасан гарагт 14%-иар өсөв. Micron-ийн хувьцаа 15.5%-иар нэмэгдлээ.

Barclays-ийн шинжээчид үйлчлүүлэгчиддээ: "Галзуу мэт өсөлтүүд хүмүүсийн төсөөлж байснаас ч илүү удаан үргэлжилж болдог гэдгийг санаарай" хэмээн зөвлөжээ.

Тэтгэвэрт гарсан хуульч Фейнберг чипний хувьцаагаа хэзээ зарахаа бодож сууна. Гэвч одоогоор тэрбээр хувьцаагаа таг түгжсээр байгаа бөгөөд сайн цаг үе мөнх биш гэдгийг өөртөө сануулж сууна.

"Хөрөнгө оруулагчийн хувьд хамгийн аюултай үг бол 'Энэ удаад өөр байх болно' гэдэг үг юм. Зах зээлийн үнэ маш өндөр байна гэж би бодож байна" гэж ахмад хууль зөвлөж байна.