Дэлхийн Төв банкуудад нийтдээ 36 мянган тонн алт хадгалагдаж байна

Дэлхий дахины нөхцөл байдал тогтворгүй, дайн, зөрчилдөөн үргэлжилсээр байгаа учраас улс орнууд алтны нөөцөө нэмэгдүүлсээр байна. Дэлхийн улс орнуудын Төв банк сүүлийн жилүүдэд алт худалдан авсаар байгаа нь ханшийг нь улам өсгөж байна. Сүүлийн 2 жилийн хугацаанд алтны ханш 2 дахин өссөн бөгөөд улмаар нөөцийн активын хувьд алт АНУ-ын Засгийн газрын бондоос давж, тэргүүлэгч байр суурийг нь эзлэх боллоо.

Европын төв банкны Мягмар гаригт гаргасан тайлангаар 2025 оны эцсээр дэлхийн нөөцийн активын 27%-ийг алт эзэлж байгаа нь өмнөх 2024 онтой харьцуулахад 20% өссөн дүн юм. Харин АНУ-ын Засгийн газрын бондны эзлэх хувь 25%-иас 22% болж бага зэрэг буурчээ.

Төв банкуудын алтны нөөц АНУ-ын Засгийн газрын бондоос давсан нь 1996 оноос хойших анхны тохиолдол болж байна.

Нөөцийн актив нь санхүүгийн хүндрэлтэй үед баталгаа болдог, олон улсын төлбөр тооцооны суурь болохоос гадна үндэсний валютын ханшийг тогтворжуулахад чухал нөлөөтэй. Улс орнууд нөөцийн активаа АНУ-ын ам.доллараар байлгадаг боловч энэ байдал сүүлийн жилүүдэд өөрчлөгдөж байна. 2022 онд Украиныг түрэмгийлсэний эсрэг АНУ Оросын эсрэг авсан хориг арга хэмжээндээ Оросын ам.долларын нөөцийг царцааснаас хойш Төв банкууд алтыг найдвартайд тооцож эхэлсэн.

“Геополитикийн нөхцөл байдал улам хурцдаж байгаагийн эсрэг арга хэмжээ болгон Төв банкууд алт худалдан авч байна” хэмээн Европын Төв банкны тэргүүн Кристин Лагард тайлангаа танилцуулах үеэрээ хэллээ.

Тус тайлангаар дэлхийн улс орнуудын Төв банкинд нийтдээ 36000 тонн алт хадгалагдаж байгаа нь Бреттон-Вудийн систем тогтож эхэлсэн үетэй дүйхүйц хэмжээнийх ажээ. Тухайн үед Төв банкуудад 38000 тонн алт байжээ.

Энэ оны 1-р сард алтны үнэ түүхэн дээд үнэ буюу нэг унц нь 5500 ам.долларт хүрсэн. 2022 оноос хойш хамгийн их алт нөөцөлсөн улсууд бол Хятад, Польш, Турк, Энэтхэг юм.