Х.Нямбаатар Канадад сурахаар явсан биш оргон зайлжээ

Нийслэлийн Засаг дарга асан Х.Нямбаатар Канадад курст сурч байгаа гэдэг ч үнэндээ хууль хүчнийхнээс зугтан оргон зайлсан бололтой. Тэрбээр яг юуны курст сурч байгаагаа хэлдэггүй.

Ямартай ч АТГ-аас Эрүүгийн хуулийн 22.1 дэх заалтаар яллагдагчаар татжээ. Туулын хурдны замын төсөл болон Улаанбаатарын шинэ тойрог замуудын төслийг хэрэгжүүлэхдээ албан тушаалаа урвуулан ашигласан гэх хэрэгт холбогдуулан нийслэлийн зарим удирдлагуудыг шалгаж дуусан агаад Х.Нямбаатарт холбогдох баримтууд мөрдөн шалгалтын явцад ил болсон байна.

Хууль хүчнийхэн өмнө нь Х.Нямбаатарын орлогчоор ажиллаж байсан Т.Даваадалай, Л.Хосбаяр болон “Улаанбаатар метро” төслийн захирал Т.Мөнхдалай, НИТХ-ын төлөөлөгч Б.Сэргэлэнбаатар нартай холбогдох мөнгө угаасан баримтуудыг ил болгосон юм.

Жишээ нь, Х.Нямбаатарын нэгдүгээр орлогч Т.Даваадалай эхнэр Б.Анхтуяатайгаа хамтран хэрхэн мөнгө угаасан болохыг баримтаар нотлогдоод байгаа.

Тэрчлэн өнгөрсөн Баасан гаригийн чуулганы хуралдаан дээр нийслэлийн Засаг дарга Б.Пүрэвдагва “Х.Нямбаатарын эхлүүлсэн Улаанбаатар хот дээр байгаа төслүүд нийслэлийн иргэдийн асуудал шийдэхээс илүү эрсдэлд оруулсан. Нэг ч тоосго өрөөгүй байж 700 тэрбум төгрөг Сэлбэ төсөлд зарцуулсан” гэсэн билээ.

Хариуд нь Х.Нямбаатар баримт, нотолгоо гаргаж үзүүлэх биш мөнөөх л хэн нэгнийг гүтгэж, доромжилж, “гөлөг төөрүүлдэг” ганц аргаараа нүүр номоороо хэрэлдсэн.

Үндсэндээ өөрийнхөө хийсэн бүхнийг хамгаалах, нотлох ганц цагаан цаас тэрбээр өнгөрсөн хугацаанд үзүүлээгүй. Эсрэгээрээ асуулт асуусан, шүүмжлэл хэлсэн болгон руу нүүр номоороо учир зүггүй хэрэлдэх болсон билээ.

Түүний хэрэгжүүлсэн Сэлбэ төслөөс НИТХ-ын төлөөлөгч Б.Сэргэлэнбаатар, Үнэн ба зөв намын генсек Ш.Мөнхсайхан нар хамтарсан компаниараа дамжуулан 200 тэрбумыг авсан баримт ил болсон. Энэ талаар Х.Нямбаатараас асуухад Б.Сэргэлэнбаатар яагаад авч болдоггүй юм бэ гэсэн ашиг сонирхлын зөрчилтэй хариулт өгч байв. Б.Сэргэлэнбаатар нь Х.Нямбаатарын туслахаар ажиллаж байсан, ойрынх нь хүн юм. Мөн барилга угсралтын ажил нэрээр 214 тэрбум төгрөгийн тендерт “Нутгийн буян групп” шалгарсан байдаг.

Б.ЦОГТ