Х.Нямбаатарт зөвлөдөг “Престиж инженеринг” бүртгэлээ яагаад олон удаа солив?

Туулын хурдны замын төслийг тойрсон хоёр талын хэлэлцүүлгийг “Тэнгэр” телевизээр шууд цацсан билээ. Нийслэлийн Засаг даргын Тамгын газрын байр суурийг хамгаалж, “Престиж инженеринг”-ийн гүйцэтгэх захирал Ш.Ганзориг оролцсон. Ш.Ганзоригийн хувьд Туулын хурдны замыг тавьснаар Улаанбаатарын үерийн эрсдэл буурна гэх “хачирхалтай” тайлбар хэлсэн. Мөн тэрбээр “Туулын хурдны зам бол Туул гол дээгүүрх зам биш, Туулын хажуугийн зам гэж хувьдаа ойлгож байгаа”-аа гэснээс харвал түүнд Х.Нямбаатарын ₮2.3 их наядын төслийг дэмжих ихээхэн том эрх ашиг байгаа бололтой.

Тэгвэл “Престиж инженеринг” нь нийслэлийн төсөвт өртөгөөр хэрэгжүүлж буй “Сэлбэ сэргэлт” төсөл дээр ажилласан компани аж. "Сэлбэ сэргэлт" төслийн усны барилга байгууламжийн зураг төслийг "Престиж инженеринг" компани хийсэн агаад гүйцэтгэх захирал Ш.Ганзориг “2005 оноос хойш барилгажилт ихэссэнээр Сэлбэ голын голдирол нарийсаж байна. Төслийн зургийг энэхүү хүндхэн нөхцөл байдалд зориулж гаргасан. Сэлбэ гол Дунд голтой нийлж буй уг хэсэг хана, хамгаалалт хийхгүй бол Буянгийн зам орчмын орон сууц байнгын усанд автах юм. Тиймээс их хэмжээний усыг өнгөрөөх хамгийн зөв шийдэл бол тэгш өнцөгт огтлолцол учраас өндөр түшиц хана хийж байгаа юм. Зургийн дагуу тохижуулж дуусгаснаар иргэд амарч тухлах нөхцөлийг хангасан байхаар төлөвлөлтийг хийсэн” гэсэн ярилцлагыг хэвлэлүүдэд гурван жилийн өмнө өгч байжээ.

"Сэлбэ сэргэлт" төслийн хүрээнд сэлбийн 1.4 км урт үргэлжлэх төмөр бетон түшиц хана бүхий далангийн ажилд нийслэлийн татварын мөнгөнөөс 20 тэрбумыг зарцуулсан.

Тэрчлэн “Престиж инженеринг” Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол, 2030 он хүртэлх хөгжлийн чиг хандлагын дагуу Улаанбаатар хотын инженерийн бэлтгэл арга хэмжээний мастер төлөвлөгөө боловсруулсан аж.  Тус компани нь төрийн олон тендерт ажлыг гүйцэтгэсэн байдаг. Тухайлбал, 2021 онд Сонгинохайрхан дүүргийн 15-р хорооны нуур сэргээх төслийг хэрэгжүүлж байжээ. Мөн нийслэлийн хэмжээнд хийгдэж буй үерийн хамгаалалт, гадаргын усны менежмент болон томоохон ТЭЗҮ боловсруулах ажлуудад мэргэжлийн зөвлөхөөр ажилладаг юм байна.

“Престиж Инженеринг” компанийн бүртгэл олон удаа солигдож байсан агаад төрийн худалдан авах ажиллагааны газрын нээлттэй сайтад тус компанитай холбоотой зураг төслийн тендерт оролцож, шалгарсан дүн мэдээлэл бүртгэгдээгүй байна. “Престиж инженеринг”, “Престиж инженеринг”, “Престиж компани" гэх мэтээр бүртгэлээ удаа дараа өөрчилж байжээ.

Б.БАТ