Хүн төрөлхтний амьдралыг орвонгоор нь өөрчлөх технологийн 5 гайхамшиг

Өнгөрсөн хагас зууны түүхийг эргэн харахад технологийн хөгжил бидний төсөөлшгүй хурдаар хувьсан өөрчлөгдөж ирлээ. "Palm Pilot" халаасны компьютер, эвхдэг утаснаас эхэлсэн энэ аялал өнөөдөр гар утасны өндөр хурдны интернэт, хиймэл оюун ухаан, генийн дараалал тогтоох технологи болон өргөжжээ. Тэгвэл ирэх 25 жил биднийг хааш нь хөтлөх вэ?

WSJ агентлаг технологийн таван шинжээчээс ирээдүйд бий болох хамгийн чухал нэгэн инновацийг нэрлэхийг хүсэхэд тэд дараах дүр зургийг буулгажээ.

1. Бодол санаагаар удирдах төхөөрөмжүүд

Ирэх 25 жилийн дараа бид компьютер болон ухаалаг төхөөрөмжтэй харилцахдаа гар ашиглахаа бүрэн болино гэж Карнеги Меллон их сургуулийн био-анагаахын инженерийн профессор Бин Хэ таамаглаж байна. Хүмүүсийн дийлэнх нь тархи-компьютерийн интерфейсийг ашиглан ердөө бодол санаагаараа бүхнийг хянах болно.

Энэхүү интерфейс нь тархины идэвхжлийг уншиж, хүний "хүсэл зорилго"-ыг компьютерт ойлгомжтой тушаал болгон хувиргах зарчмаар ажиллана. "Тархи-компьютерийн интерфейс нь өнөөдрийн ухаалаг утас шиг хүн бүрийн хэрэглээ болох бөгөөд энэ нь амьдралыг асар хялбарчилна. Тэгээд орчин тойрноо удирдана" гэж профессор Хэ тайлбарлаж байна. Түүний үзэж буйгаар ирэх 25 жилд олон тэрбум хүн найз руугаа зурвас бичихээс эхлээд гэрлээ асаах, кофе чанах зэрэг өдөр тутмын бүх үйлдлийг бодлоороо гүйцэтгэдэг болсон байна.

Өнөөдөр ийм төрлийн төхөөрөмжүүд байгаа боловч ихэнх нь гавлын ясыг өрөмдөж, тархинд чип суулгах мэс заслын аргад тулгуурладаг. Харин ирэх жилүүдэд судлаачид техник хангамжийн асуудлыг шийдэж, өнөөдрийн утасгүй чихэвч шиг эвтэйхэн, инвазив бус (мэс засалгүй) интерфейсүүдийг бүтээх болно. Мөн хиймэл оюун ухааны тусламжтайгаар тархины нарийн төвөгтэй дохиог тайлах "программ хангамжийн сорилт"-ыг давснаар энэ технологи ахуйн хэрэглээнд бүрэн нэвтрэх юм.

2. Сансрын уурхай:

Тафтс их сургуулийн Инженерийн сургуулийн профессор, IEEE-ийн гишүүн Карен Панеттагийн үзэж байгаагаар, AI болон робот техникийн үсрэнгүй хөгжил нь сар, солир, цаашлаад бусад гариг дээрх байгалийн нөөц баялгийг олборлох боломжийг олгоно.

Бие даасан роботууд сансарт олборлолт хийж, тэрхүү түүхий эдээрээ сансрын станц барих, дараагийн экспедицийг бэлтгэх төслийг хэрэгжүүлэх ба ингэснээр сансар судлалын зардал эрс буурна. "Хэрэв бид сансарт нөөц баялгаа өөрсдөө боловсруулж чадвал асар их түлш хэмнэж, сансрын аялал жуулчлал, сансрын зочид буудал зэрэг арилжааны төслүүд бодитой болно" гэж Панетта хэлэв.

Хамгийн сонирхолтой нь сансарт гаргаж авсан технологиуд дэлхий дээрх бидний амьдралыг сайжруулсаар ирсэн. Жишээлбэл, НАСА-ийн сансарт ашиглахаар бүтээсэн лазер өнөөдөр түлэгдсэн өвчтөний шархыг анагаах, амьд эсийг гэмтээлгүй мэс засал хийхэд ашиглагдаж байна. Ирэх 25 жилд сансрын уурхай бидэнд ямар шинэ нээлт авчрахыг өнөөдөр төсөөлөхийн аргагүй юм.

Кикбоксын тэмцээн дээрх Unitree хүн дүрст роботууд. Хөгжүүлэлт нь эднийг улам бүр "хүн" болгон хувиргаж магадгүй.

3. Гэр ахуйн хүн дүрст роботууд:

Өнөөдрийн хүн дүрст роботууд болхи, бүдэрч унадаг, бас дэндүү үнэтэй байгаа нь үнэн. Гэхдээ Стивенсийн AI хүрээлэнгийн захирал Брендан Энглот ирэх 25 жил тэднийг бидний салшгүй туслах болгон хувиргана гэж үзэж байна.

Дроны мэдрэгч болон өөрөө явагч автомашины технологи хөгжсөнөөр робот бүтээх зардал буурч, ухаалаг байдал нь нэмэгдсээр байна. Бидний амьдарч буй орчин шат, хаалганы бариул, шүүгээ зэрэг нь хүний биеийн бүтцэд зориулагдсан тул хүн дүрст робот нь ахуйн хэрэглээнд хамгийн тохиромжтой шийдэл юм.

Эдгээр робот зөвхөн гэр цэвэрлэх бус, ахмад настнуудыг асрах, хөгжлийн бэрхшээлтэй хүмүүст туслах, тэр байтугай сэтгэл зүйн дэмжлэг үзүүлэх хань ижил болох юм. "Таны хайртай хүн хэдэн мянган милийн цаана байгаа ч, түүний төрх, дуу хоолойг дуурайсан робот таны дэргэд байж, танд халамж анхаарал тавьдаг болох тэрхүү 'теле-оршихуйн' хувьсгалыг би төсөөлж байна" гэж Энглот өгүүллээ.

Үүлийг удирдах сумыг цэнэглэж байна. Хятад.

4. Хувийн цаг уурын хяналт:

Хэдийгээр дэлхийн засгийн газрууд нүүрстөрөгчийн ялгарлыг бууруулахаар ажиллаж байгаа ч уур амьсгалын өөрчлөлт нэгэнт эхэлсэн тул ирээдүйд цаг агаар улам тогтворгүй болно. Энэ нь "хувийн цаг уурын хяналт"-ын эрин үеийг авчирна гэж "Future Today" стратегийн группийн гүйцэтгэх захирал Эми Уэбб үзэж байна.

"25 жилийн дараа урьдчилан таамаглахуйц, тогтвортой цаг агаар нь тансаг зэрэглэлийн бараа болон хувирна" гэж тэрбээр хэлэв. Бид бичил цаг уурыг удирдах технологийг өргөн цар хүрээтэй ашиглаж эхэлнэ. Хөдөө аж ахуйн томоохон компаниуд усан үзмийн талбайдаа оновчтой температур тогтоох, амралтын газрууд наранд шарлагын талбай дээрээ бороо оруулахгүй байх эсвэл цанын бааздаа цас оруулах зэрэг технологийг ашиглах болно.

Цаашлаад шуурганы чиглэлийг өөрчлөх, хүчийг нь сулруулах технологи хөгжсөнөөр хүнсний нийлүүлэлтийг гамшгаас хамгаалах боломж бүрдэнэ. Гэсэн хэдий ч нэг бүс нутгийн цаг агаарыг өөрчлөх нь хөрш зэргэлдээ нутагт ямар нөлөө үзүүлэх вэ гэдэг нь ёс зүйн болон геополитикийн томоохон асуудал болон үлдэх юм.

5. Цөмийн нэгдэл (Nuclear Fusion): "Галыг" дахин олсон мэт хувьсгал

Нотр-Дамын их сургуулийн профессор Майк Бехтел ирэх 25 жилд хүн төрөлхтөн цэвэр, хязгааргүй эрчим хүчний эх үүсвэртэй болно гэж таамаглаж байна. Энэ бол цөмийн нэгдэл юм.

Сүүлийн 50 жилийн турш "цөмийн нэгдэл гарахад 20 жил дутуу байна" гэх яриа байсаар ирсэн. Гэхдээ энэ удаад нөхцөл байдал өөр байна. Лабораторийн орчинд урвалаас гарах эрчим хүч нь зарцуулсан эрчим хүчээсээ давсан (net energy gain) түүхэн амжилтад хүрч чадлаа. Энэ нь шинжлэх ухааны туршилтаас инженерийн хэрэглээ рүү шилжих эхлэл юм.

Цөмийн нэгдэл нь нарны ажиллах зарчимтай ижил бөгөөд ямар ч хорт хаягдал, нүүрстөрөгчийн хий ялгаруулдаггүй. Хэрэв бид хязгааргүй, хямд эрчим хүчтэй болбол далайн усыг давсгүйжүүлж ундны ус гаргах, AI-ийн асар их өгөгдлийн төвүүдийг тэжээх, биткойн олборлох зэрэг эрчим хүч ихээр шаардсан бүх асуудал арилна.

"Бид хиймэл оюун ухааныг цахилгаан эрчим хүчтэй зүйрлэдэг бол, цөмийн нэгдэл нь хүн төрөлхтний хувьд 'гал'-ыг нээсэнтэй адил түүхэн том эргэлт болох болно" гэж Бехтел дүгнэжээ.

Энэхүү таван инноваци нь ирэх 25 жилд дэлхий ертөнцийг илүү аюулгүй, илүү хялбар бөгөөд эрчим хүчний дутагдалгүй болгох ирээдүйг амлаж байна. Гэхдээ эдгээр нь зөвхөн технологийн ололт бус, хүний нийгмийн харилцаа, ёс зүй, байгаль орчны асуудалд шинэ сорилтуудыг авчрах нь дамжиггүй.