Иргэдийн инфляцын хүлээлт тогтвортой байна

Дөрөвдүгээр сарын эцэст инфляц 10.1%-д хүрч, Төв банкны бодлогын зорилтот түвшнөөс давсан. Үүнтэй холбоотойгоор олон нийт, мэргэжилтнүүд инфляц энэ онд Монголбанкны зорилт болох 6% орчимд хадгалагдах боломжтой эсэх асуудлыг хөндөж буй билээ. Энэ талаар Монголбанкны Мөнгөний бодлого, судалгааны газрын захирал Н.Ургамалсувд "Блүүмбэрг" телевизэд өгсөн ярилцлагадаа дурдсан байна.

Тэрбээр “Одоогийн инфляцын өсөлт голчлон нийлүүлэлтийн шалтгаантай байгаа учраас мөнгөний бодлогын шууд хариу арга хэмжээ авах зохистой бус. Бидний хамгийн анхаарч байгаа зүйл бол нийлүүлэлтийн шалтгаантай үнийн өсөлтийн хоёр дахь үеийн нөлөө болон инфляцын хүлээлт юм. Монголбанкнаас хийсэн иргэдийн инфляцын хүлээлтийн судалгааны үр дүнгээр хоёрдугаар улиралд иргэдийн инфляцын богино хугацааны хүлээлт 0.4 нэгж хувиар өсөж, 7.9%-тай гарсан. Харин 12 сарын хугацаатай буюу урт хугацааны хүлээлт ердөө 0.2 нэгж хувиар өссөн бөгөөд харьцангуй тогтвортой хэвээр байна. Өөрөөр хэлбэл, инфляцын хүлээлт тогтвортой байгаа нь эерэг үзүүлэлт юм. Төв банкны хувьд оны хоёрдугаар хагаст инфляц саарах хандлага үргэлжилнэ гэж хүлээж байна. Өмнөх төсөөллөөр оны эцэст инфляц 8%-д ойртоно гэж тооцоолж байсан бол одоогийн байдлаар шатахууны үнийн өсөлтийн нөлөөг тусгахад инфляц нэг оронтой тоо рүү орох хэдий ч 8%-иас өндөр гарах магадлалтай байна” гэжээ.