З.Энхболд ба жирийн цагдаа: Хууль хэнд нь чанга, хэнд нь ёс төдий үйлчлээд байгаа юм бэ

Зам тээврийн сайд асан Б.Энх-Амгалан, ЕТГ-ын дарга асан З.Энхболд нарыг авлига, албан тушаалын хэрэгт буруутай гэж үзэн шүүхээс 2 жилийн хорих ял оноосон. Үүнтэй холбоотойгоор олон нийтийн сүлжээн дэх иргэдийн сэтгэгдлийг хүргэе.

Өнөөдөр авлигатай холбоотой хоёр хэргийн мэдээ анхаарал татлаа. Нэг нь өрх толгойлсон цагдаа 100 мянган төгрөгийн хахуул авсан хэргээр 2 жилийн ял авсан мэдээ. Хоёр хүүхэдтэй. Цагдаагийн албан хаагчийг хорьсон учир хүүхдүүдийг нь харж хандах хүнгүй. 3 кг үхрийн махны мөнгө авлигад авсан. Хууль чанга учраас 2 жил хоригдлоо. Хийсэн үйлдэл нь буруу байсан болохоор хуулийн дагуу л арга хэмжээ авч байгаа байх.

Гэхдээ энд нэг хачин зүйл болоод байна аа. УИХ-ын дарга байсан З.Энхболд сүүлд Ерөнхийлөгчийн Тамгын газрын дарга байхдаа "Страто" гэдэг компанид давуу байдал олгосон. Тэр компани нь жилд 1.5 сая тонн нүүрс угааж зараад 740 тэрбумын орлого олдог байж. Гол нь энэ компани нь З.Энхболдын төрсөн дүүтэй хамаарал бүхий байсан. Энэ нь ноцтой үйлдэл, хамаарал бүхий этгээддээ давуу эрх олгосон гэж шүүх үзэж ял оноосон байх. Гэхдээ ял нь яагаад 2 жил байгаа юм бол. Үүнийг л хачин гээд гайхаад байна л даа.

Цагдаа авлига авчээ, 100 мянган төгрөг байж. Тэр хүний амьдрал хэцүү байсан эсэх нь авлига авсан үйлдлийг нь зөвтгөхгүй, тийм үү. Хууль чанга учраас 2 жилийн ял өглөө. Бид авлигатай эвлэрэх ёсгүй. Гэтэл Ерөнхийлөгчийн Тамгын газрын даргаар ажиллаж байхдаа нэг албан тушаалтан өөрийн хамаарал бүхий этгээдэд давуу эрх олгоод, компанид нь ногоон гэрлээр мөнгө олох боломж гаргаад өгчихөж. Жилдээ 740 тэрбумын орлоготой. 10-хан хувийн ашигтай ажиллахад 74 тэрбум төгрөг. Гэтэл түүнд ч бас 2 жил.

Нөгөө чанга хууль чинь тэгээд яг хэнд нь чанга үйлчлээд, хэнд нь ёс төдий маягтай үйлчлээд байгаа юм бэ ээ. Иргэдийн гайхаад байгаа юм энэ л байна.

Сэтгүүлч Н.ПУНЦАГДОРЖ