Москвагийн харанхуй шинэ жил!

Шинэ жил оросуудын хувьд тэмдэглэх дуртай баяр нь байсан бол өдгөө зовлон, зүдгүүр болж хувирчээ. 

Украины зүгээс Кремльд шинэ жилийн “бэлэг” болгон, цахилгаан эрчим хүчний эх үүсвэрийг нь онилсон дроны цохилт өгснөөр олон зуун мянган айл, өрх харанхуйд автсан юм. Раменский, Жуковский, Литкарино хотын 100 гаруй оршин суугч өвлийн ид хүйтэнд цахилгаангүй болсон Оросын эрчим хүчний “ПАО Россети” компани мэдээлснийг “Daily Mail” онцолжээ.

Олон нийтийн сүлжээнд тавигдсан бичлэгт бүхэл бүтэн цамхагууд гэрэлгүй, гудамжны гэрлүүд бүрэн унтарснаас болж унтарсан байна. 

Москва “Өндөр хүчдэлийн цахилгааны дэд станц автоматаар унтарснаас үүдэн цахилгаан тасарсан” гэж мэдэгдсэн байгаа ч энэ нь Украины нисгэгчгүй онгоцны дайралтаас болсон гэж цэргийн шинжээчид дүгнэжээ.

Оросын агаарын довтолгооноос хамгаалах ангиуд шинэ жилийн үеэр Украины нийт 27 нисгэгчгүй онгоцыг устгасан бөгөөд гурвыг нь Москва мужид устгасан гэж Оросын Батлан ​​хамгаалах яам мэдэгдэв. Москва мужийн захирагч Андрей Воробьев "Telegram" хуудсаараа дамжуулан Украины 21 нисгэгчгүй онгоцыг тус бүс нутагт өдрийн турш устгасан гэж мэдэгджээ. Зарим мэдээллээр, нисгэгчгүй онгоцны цохилт, дараа нь цахилгаан тасарсан нь нисэх буудлуудын үйл ажиллагааг түр зогсооход хүргэсэн байна.

Олон нийтийн мэдээллийн хэрэгслээр энэ халдлага нь Украины дайралтын дараа Москвагийн зарим хэсэг эрчим хүчээ алдсан анхны тохиолдол болж байна гэж мэдээлжээ.

Тэгвэл 5.6 сая орчим оршин суугчтай Оросын хоёр дахь том хот болох Санкт-Петербург нь Украины дроны довтолгооноос болж шинэ жилийн баяраа харанхуй угтсан байна. Тус хот нь  өвлийн хахир саруудад төвлөрсөн халаалтын системээс ихээхэн хамааралтай байдаг.

2025 оны сүүлийн саруудаас эхлээд Украины нисгэгчгүй онгоцууд Оросын эрчим хүч, нефтийн үйлдвэрлэлийг онилох болсон. Киевийн тагнуулын мэдээлснээр Оросын нефтийн үйлдвэрлэлийн 35 хувь нь эвдэрч, доголдсон байна. Үүний улмаас тус улсын дотоодын зах зээл шатахууны тодорхой хэмжээний хомсдолд орсон.  Украины дайны гол сратеги нь Оросын нефтийн бааз, боловсруулах үйлдвэрүүд, хими-зэвсгийн үйлдвэрлэл, эрчим хүчний эх үүсвэрүүдийг гол байгаа болгож байна. 

Кремль Украин дахь дайнаа санхүүжүүлэх хөрөнгийн хомсдолд орж, ОХУ-ын Засгийн газар аж ахуйн нэгж, айл өрхүүдийн татварыг нэмэгдүүлэх зэрэг таагүй арга хэмжээ авах болсон. ОХУ-ын Pасгийн газар маргааш гэж үгүй ​​мэт дайны санхүүжилтэд дийлэнх хөрөнгөө зарцуулж байгаа учраас инфляци тасралтгүй өсөж, Төв банкны тооцоолсноос хамаагүй нэмэгдэж байна.  Өргөн хэрэглээний үнийн хөөрөгдлийг барихын тулд бодлогын хүүг өндөр төвшинд барих болсон. 

Тус улсын бодлогын хүү хоёр оронтой тоотой байгаа ч зээлийн хүү хэт өндөр болсноор хувийн хэвшлүүд санхүүгийн дарамтад орж байна. 2025 оны 3-р улирал гэхэд хувийн компаниуд ашгийнхаа 38 хувийг зээлийн хүүнд өгчээ.

Оросын аж үйлдвэрлэл хоёр хуваагдсан. Нэгдэх нь, өсөн нэмэгдэж буй цэргийн төсвийн санхүүжилт. Хоёрдахь нь, зогсонги байдалд орсон иргэний салбар. Тус улсад огцом уналтад орсон салбар нэмэгдсээр байна.

Барилгын салбар 12-20%, автомашины үйлдвэрлэл 61%, вагоны үйлдвэрлэл 33.7%-иар унав. Оросын төмөр зам дөрвөн их наяд рубль буюу $52.6 тэрбумын өртэй болсноор хөрөнгө оруулалтын хөтөлбөрөө бууруулахад хүрсэн.  Эсрэгээрээ нисэх онгоцны үйлдвэрлэл 86 хувиар өссөн байна.

Дайны нөлөөгөөр Төв Азиас орж ирэх цагаачдын урсгал эрс багассан нь ажиллах хүчний хомсдолд хүргэсэн байна.

Орос-Украины дайн орчин үед зөвхөн фронт дээр, цэргийн олноор биш техник, технологийн дэвшилтийг ашиглан эдийн засаг + логистик + дэд бүтэц дээр өрнөж буйг харуулж байна. 

Эх сурвалж: “Daily Mail”, “Moscow times”, “Telegram”