“Оюутолгой”-н сонсгол: Н.Алтанхуягийн популизм ба няцаалт

"Оюутолгой"-н нээлттэй сонсголын үеэр Н.Алтанхуяг “...Оюутолгойтой хийсэн хөрөнгө оруулалтын гэрээнд өөрчлөлт оруулах ажлын хэсэг байгуулагдаад манай Засгийн газар руу "гал ирсэн" хэмээн ичихгүй худлаа ярив.

Тэрбээр "Оюутолгой"-н сонсголыг өмнөх булхай луйвар, гэм нүглээ нуух сайхан боломж гэж эндүүрэв.

Яг үнэндээ Н.Алтанхуягийн Засгийн газар "Оюутолгой"-н асуудлаас болж огцорсон гэдэг нь ор үндэслэлгүй.

Баримт сөхье. 2014 оны 11-р сарын 05

УИХ-ын чуулганы хуралдаанаар Ерөнхий сайд Н.Алтанхуягийг огцруулах асуудлыг хэлэлцэж, 54,6%-ийн саналаар Ерөнхий сайдаас огцруулав.

Хэдийгээр огцруулах саналыг УИХ дахь МАН-ын бүлгээс тавьсан ч яг үнэндээ түүнийг огцруулсан хүмүүс нь УИХ дахь Ардчилсан нам болон “Шударга ёс” эвслийн бүлгийн найман гишүүн байв.

Тухайлбал, түүнийг Женко Х.Баттулга, Ж.Батзандан, Д.Батцогт, Р.Бурмаа, М.Зоригт, Г.Уянга, Л.Эрдэнэчимэг, Р.Амаржаргал нарын нам нэгтнүүд нь огцруулах кноп дарсан бол АН-ын зарим гишүүн ирцэнд оролгүй эс үйлдэхүйгээрээ түүнийг унагаасан юм.

Тухайн үед Женко Х.Баттулга “...Н.Алтанхуягийн Засгийн газрыг огцруулах бичигт та гарын үсэг зурсан уу...” гэсэн сэтгүүлчийн асуултад “Би зурсан, зурсан. Нэн тэргүүнд зурсан. Заналтайгаар зурсан” гэж хариулсан бичлэг нь өнөөдөр баримт болон үлджээ.

Н.Алтанхуягийг огцруулах дөрвөн үндэслэл гаргаж тавьсанаас хамгийн том нь Монгол Улсын нийгэм, эдийн засгийн уналт болоод түүнийг тойрон хүрээлэгчдийн орооцолдсон авлига, албан тушаалын ноцтой хэргүүд байв.

Н.Алтанхуягийн ахлах зөвлөх Л.Гансүх нарын 4 этгээд “Нүүрс” хөтөлбөрөөс 13 тэрбум төгрөг завшсан нь тогтоогдож шүүхээс ял авсан, мөн түүний Засгийн газрын Хэрэг эрхлэх газрын тэргүүн дэд дарга, Н.Алтанхуягийн хүргэн гэгддэг Г.Дэнзэн "Эрдэнэс Тавантолгой" компанийн ТУЗ-ийн даргаар ажиллаж байхдаа эхнэрийнхээ нэр дээрх ямар ч түүхгүй дөнгөж байгуулагдсан компанийг 17 тэрбумын тендерт ялуулсан, эрх мэдлээ хэтрүүлэн ашиг сонирхлын зөрчил гаргасан, Засгийн газар Чингис бондын мөнгийг дур зоргоороо зарцуулсан хэргүүд Н.Алтанхуягийн Засгийн газар огцрох үндэслэл болсон юм.

 Б.БАТ