Айлчлал: Азид явуулах гадаад бодлогын тэргүүлэх чиглэлд Монголтой харилцах харилцаа хэвээр байна

Манай сурвалжлагч Д.Нарантуяа Москвагаас мэдээлж байна.

ОХУ-д айлчилж байгаа УИХ-ын дарга, МАН-ын дарга Н.Учрал Москва хотноо Аюулгүйн зөвлөлийн орлогч дарга, “Единая Россия” намын дарга Дмитрий Медведевтэй уулзлаа хэмээн “Единая Россия” намын сайтад мэдээллээ.

УИХ-ын дарга Н.Учрал халуун дотно хүлээн авч байгаад талархал илэрхийлээд анхны УИХ-ын даргын хувиар албан айлчлалаа мөнхийн хөрш, стратегийн түнш ОХУ-аас эхэлж байгаадаа баяртай байгаагаа илэрхийллээ. Мөн Монгол Улсын Ерөнхийлөгч Ухнаагийн Хүрэлсүхийн мэндчилгээг дамжууллаа. “Монгол Улсын Ерөнхийлөгч Ухнаагийн Хүрэлсүх МАН-ын дарга, Ерөнхий сайдаар ажиллаж байхдаа та бүхэнтэй маш сайн харилцаатай байж, хоёр улсын харилцааг хөгжүүлэхэд том хувь нэмэр оруулсан” хэмээн Н.Учрал хэллээ.

Дмитрий Медведев УИХ-ын даргаар сонгогдсонд Н.Учралд баяр хүргээд “Монгол Улстай харилцах харилцаа нь ОХУ-ын Азид явуулах гадаад бодлогын тэргүүлэх чиглэл хэвээр байх”-ыг Д.Медведев онцоллоо.

Олон нийтийн Max сүлжээндээ Д.Медведев “Евразийн харилцааны суурин дээр гадны шахалтад тэсвэртэй тогтвортой хөгжлийг хангах нь хоёр улсын эрх ашигт нийцнэ” хэмээн бичжээ.