Өвлийн цагийн хуваарьт шилжихгүй

“2025 оны аравдугаар сарын 25-наас 26-нд шилжих шөнө Монгол Улс өвлийн цагийн хуваарьт шилжинэ” гэсэн мэдээлэл Пүрэв гаригт (2025.10.23) олон нийтийн сүлжээгээр тарсан нь бодит биш худал мэдээлэл болохыг Монголын баримт шалгах төв мэдээлжээ.

Өвлийн, эсвэл зуны цагийн хуваарьт шилжих практик дэлхийн улс оронд байдаг. Монгол Улс ч мөн нэгэн үе энэ практикийг хэрэглэж байсан. Харин 2017 оноос хойш энэ практикийг хэрэглээгүй. Цагийн хуваарьт өөрчлөлт оруулахыг Засгийн газрын тогтоолоор шийддэг. “Засгийн газар цагийн хуваарьт өөрчлөлт оруулах ямар нэг тогтоол гаргаагүй” хэмээн Засгийн газрын Хэвлэл мэдээлэл, олон нийттэй харилцах алба 2025.10.24-ний өдөр мөн мэдээллээ.

Монголын баримт шалгах төвийн нягталснаар 2015 оны гуравдугаар сарын 09-нд Засгийн газрын 82 дугаар “Зуны цагийн тоололт шилжүүлэх тухай” тогтоолыг баталж байсан ч 2017 онд уг тогтоолыг хүчингүй болгосноор 2017 оноос өнөөг хүртэл Монгол Улс цагийн хуваарьтаа өөрчлөлт хийгээгүй.

Монголын баримт шалгах төвийн шалгаснаар 2025 оны аравдугаар сарын 23-нд Tug.mn (архивласан хувилбар) хуудаснаас “2025 оны аравдугаар сарын 25-26-нд шилжих шөнө өвлийн цагийн хуваарьт шилжинэ” гэх мэдээллийг нийтэлжээ. Тус постыг нийт 438 реакц, 124 сэтгэгдлээр идэвхжүүлж, 443 удаа цааш түгээсэн байжээ.

Мөн тус төвийн олж тогтоосноор ийм ижил агуулга бүхий мэдээлэл Frants Rennes MGL-chuud Facebook бүлгэмд Happy Bold (архивласан хувилбар) хаягаас “НЯМ ГАРАГТ ЦАГ УХАРНА. 2025.10.25-наас 26-нд шилжих шөнө цаг өвлийн цагийн хуваарьт шилжинэ. Шөнийн 03:00 цагт цагаа 02:00 цаг болгон хойшлуулж 1 цагаар илүү амарна шүү!” тавигджээ. “Энэ групп нь Франц улсад амьдардаг монголчуудын нэгдсэн бүлгэм юм. Франц улс 1998 оноос хойш  жил бүр гурав болон аравдугаар сарын сүүлийн ням гарагт зун, өвлийн цагийн тоололд шилжүүлдэг. Энэ сарын сүүлийн Ням гараг буюу 2025 оны аравдугаар сарын 25-26-ны хооронд шилжих шөнө өвлийн цагийн тоололд шилжих тухай Францын Sortir à Paris мэдээллийн сайтад мэдээлжээ. Tug.mn хуудаснаас оруулсан мэдээлэл нь Happy Bold хаягаас оруулсан Франц улсын цагийн хуваарь шилжих тухай постын тексттэй ижил байна” хэмээн Монголын баримт шалгах төв цахим хуудастаа нийтэлжээ.