Ойрх дорнод: Асуудал онц ноцтой хэвээр байна

НАТО-гийн Ерөнхий нарийн бичгийн дарга Марк Рютте АНУ-аас Ираны эсрэг хийсэн сүүлийн үеийн цэргийн цохилтыг дэмжиж, үүнийг "туйлын зайлшгүй" үйлдэл гэж мэдэгдлээ.

Анкара хотноо зохион байгуулагдаж буй НАТО-гийн холбоотон орнуудын дээд хэмжээний уулзалтын өмнө Рютте сэтгүүлчдэд мэдээлэл өгөхдөө "Гал зогсоох хэлэлцээр байгуулсан үед Иран улс уг тохиролцоог үндсэндээ зөрчиж байгааг бид харлаа. Урьд өдөр нь усан онгоцууд руу халдсан үйл явдал болсон тул АНУ-ын зүгээс шийдвэртэй, хүчтэй хариу арга хэмжээ авах нь маш чухал гэж би үзэж байна" гэжээ.

Түүнчлэн Ираны асуудал дээд хэмжээний уулзалтын хэлэлцүүлгийн үндсэн сэдэв байхыг тэмдэглэлээ. Тэрбээр "Холбоотон орнууд Иранд цөмийн зэвсэг эзэмших боломжийг хэзээ ч олгож болохгүй гэдгийг өнөөдөр (2026.07.08) дахин батлах байх. Хоёрдугаарт, Хормузын хоолойг бүрэн чөлөөтэй болгож, усан замын чөлөөтэй зорчих зарчмыг хангах нь нэн чухал гэдгийг бататгана гэж найдаж байна" хэмээн нэмж хэлэв.

Иран улс Аятулла Али Хаменеитэй салах ёс гүйцэтгэж, зургаан өдрийн гашуудал зарлах үеэр хотуудын гудамж талбайд асар их хүн цуглажээ. Гэвч түүний хүү Можтаба Хаменеи тус ёслолд оролцоогүй нь Ираны ирээдүйн удирдлагын залгамж халаа хэрхэж буй талаар олон асуулт, эргэлзээг дагуулж байна.

Ираны Исламын хувьсгалт гвардын корпус (ИХГК) нь АНУ-ын Ираны өмнөд хэсэгт өгсөн цохилтын хариуд Бахрейн болон Кувейт дэх АНУ-ын цэргийн 85 объектыг довтолсон гэдгээ мэдэгдлээ. Мөн Ираны хэвлэл мэдээллийн хэрэгслүүдийн мэдээлж буйгаар, ИХГК-ийнхан тус улсын өмнөд бүс нутагт АНУ-ын армийн нисгэгчгүй нисэх төхөөрөмжийг (дрон) унагасан гэж мэдээлжээ.

АНУ Иранд шөнийн цагаар цохилт өгсний дараа Кувейт улсад халдлагаас сэрэмжлүүлэх түгшүүрийн дохио дуугарсан талаар тус улсын төрийн өмчит мэдээллийн агентлаг уламжлав. Кувейтийн армийн зүгээс агаарын довтолгооноос хамгаалах хүчин нь гадны "дайсагнасан" пуужин болон дроны халдлагын эсрэг хариу арга хэмжээ авч, эсэргүүцэн цохиж байгааг мэдэгдсэн байна.

Ижил хугацаанд Бахрейн улсад ч мөн адил болзошгүй халдлагыг анхааруулсан агаарын түгшүүрийн дохио ажиллаж эхэлжээ. Тус улсын Дотоод хэргийн яам өөрийн албан ёсны X (хуучин Twitter) хуудсаараа дамжуулан "Иргэд болон оршин суугчдыг тайван байж, хамгийн ойр орших аюулгүй хорогдох байранд очихыг уриалж байна" гэсэн мэдэгдлийг гаргасан байна. Бахрейн улс нь АНУ болон Израилийн Ирантай хийсэн хамтарсан дайны үеэр Ираны зүгээс ирэх пуужин болон дроны довтолгоонд байнга өртдөг гол бай болж байсан юм.