Шатахуун олголтод тавьсан хязгаарлалтыг цуцаллаа

Засгийн газар ээлжит бусаар хуралдан (2025.10.28) шатахууны хязгаарлалтыг цуцаллаа.

Сүүлийн өдрүүдэд шатахууныг хязгаарлалтад олгож байсан нь иргэдийг ихээр бухимдуулж байсан. Иргэд урт дараалалд 3-4 цаг зогсч, хомсдлыг далимдуулан 3-4 дахин нугалсан үнээр шагийн шатахуун зарах болсон.

Хуралдаанаар монголчуудын зонхилон хэрэглэдэг АИ-92 автобензиний импорт, тээвэрлэлт, борлуулалтын нөхцөл байдлын талаар хэлэлцлээ. Шатахууны аюулгүйн нөөц бүрдүүлэх зорилгоор нэг удаагийн үйлчлэлтэй хуулийн төсөл санаачилж, УИХ-аар шийдвэрлүүлэхээр тогтлоо. Мөн аравдугаар сарын 28-ны өдрөөс эхлэн Улаанбаатар хотын шатахуун түгээх станцууд хэрэглэгчдэд тавьсан шатахууны хязгаарлалтыг цуцлахаар болсон тухай Аж үйлдвэр, эрдэс баялгийн сайд Г.Дамдинням Засгийн газрын ээлжит бус хуралдаанд мэдээллээ.

Аравдугаар сарын 28-ны 08.00 цагийн байдлаар нийт 86 вагон шатахуун байгаагаас Толгойт өртөөнд 16, Аршаант өртөөнд 6, Улаанбаатар өртөөнд 5, Дархан өртөөнд 10, Сайншанд өртөөнд 5, Эрдэнэт өртөөнд 10, Сүхбаатар өртөөнд 34 вагон байгааг сайд хэллээ.

Улаанбаатар хот дахь шатахуун импортлогч томоохон аж ахуйн нэгжүүдийн агуулахын АИ-92 автобензиний нөөц аравдугаар сарын 28-нй 09.00 цагийн байдлаар 2,824 тонн байгаа ба агуулахуудад 30 вагон буюу нийт 1,800 тонн АИ-92 автобензин буужээ. Агуулахад буусан шатахууныг Улаанбаатар хот дахь шатахуун түгээх 115 станц руу 1169 тонн, орон нутаг руу 592 тонныг ачсан байна.