“Сибирийн хүч-2”-оор нийлүүлэх хийн үнийг хятадууд $50 хэмээн тулгажээ

Хятадуудын Оросоос “Сибирийн хүч-2” хоолойгоор дамжуулах авах байгалийн хийн үнийн талаарх анхны мэдээллийг The Wall Street Journal (WSJ) өглөө.

WSJ-ийн уржигдар мэдээлснээр “Сибирийн хүч-2” хоолойгоор авах хийн үнэ нь Оросын дотоодын зах зээлийн үнэтэй ижил байх нөхцөлд л наймаа явагдана гэсэн байр суурийг Бээжин илэрхийлсэн гэжээ.

Монголын нутгаар дайруулан тавихаар төлөвлөгдсөн “Сибирийн хүч-2” хоолойн төсөл яригдаж эхлээд 10 гаруй жилийн нүүр үзэж байгаа ч гол худалдан авагч Хятадын зүгээс за ч гэхгүй, үгүй ч гэхгүй өнөөг хүрсэн билээ.

Орос, Хятад хоёр төслийг урагшлуулахгүй байгаа гол шалтгаан нь худалдан авах үнээ тохиролцож чадахгүй байгаа гэсэн мэдээллүүд гарч байсан ч хятадууд чухам ямар үнийг тулгаж байгаа тухай тодорхой тоо ил болж байгаагүй юм.

Оросын дотоодын зах зээлийн үнэ гэдэг нь 1000 куб.м нь $50 гэсэн үг юм. Оросын дотоодын үнэ гэдэг нь өөрийн өртгийн үнэ биш. Байгалийн хийн экспортын орлогоос төрийн татаасаар нөхдөг, өөрийн өртгөөс доогуур үнэ юм. Хятадууд энэ нөхцөлөө өнгөрсөн 5-р сард Путиныг Бээжинд айлчлахын өмнөхөн Хятадад айлчилсан “Газпром”-ын удирдлагуудад илэрхийлсэн, хэрвээ энэ нөхцөл хангагдахгүй бол “Сибирийн хүч-2” төслийг хэрэгжүүлэх боломжгүй гэж тулгасан хэмээн WSJ бичжээ. Хятадуудын тулгаж буй үнэ нь Москва энэ төслөө бүрэн өөрөө санхүүжүүлнэ гэсэн үг юм.

Төслийг хэрэгжүүлэхээр хоёр тал өнгөрсөн 2025 онд санамж бичиг зурсан ч энэхүү алхам нь төсөл хэрэгжинэ гэсэн баталгаа болохгүй хэмээжээ. Путины 5-р сарын айлчлалаар төслийг идэвхжүүлнэ гэж албан уулзалтаар тохирсон ч тодорхой хугацааг дурдаагүй.

Кремлийн хувьд энэхүү шинэ маршрут нь амин чухал хэрэгцээтэй төслийн нэг болоод байгаа.

“Сибирийн хүч-2” төсөл нь Оросоос Хятад хүртэл 6700 км үргэлжлэх урттай хийн хоолойн тавих төсөл бөгөөд үүний 2700 гаруй км нь Оросын нутагт, 1000 гаруй нь Монголын нутгаар тавигдах ТЭЗҮ-тэй. Жилдээ 50 тэрбум куб.м хий дамжуулах хүчин чадалтай байх юм.

2019 онд ашиглалтад орсон “Сибирийн хүч-1” хоолойгоор Хятад байгалийн хий Оросоос авч байгаа. Жилдээ 30 тэрбум куб.м хий нийлүүлэх хүчин чадалтай энэ хоолой өнгөрсөн 2025 оноос төслийн хүчин чадалдаа хүрсэн. “Сибирийн хүч-1” хоолойгоор Хятадад нийлүүлж буй хийн үнэ олон нийтэд төдийлөн ил болоогүй ч Оросын “Газпром”, Хятадын төрийн өмчийн CNPC компанийн хооронд хийгдсэн 30 жилийн гэрээний үнэ олон улсын зах зээлийн үнэд дөхсөн буюу 1000 куб.м нь $250 орчим гэж шинжээчид бичдэг.