Токиогийн сургуулилалт ба Бээжингийн буруутгал

The Japan Times (2026-06-23)

Хятадын тэнгисийн цэргийн нисэх онгоц тээвэрлэгч хөлөг онгоцны флотын 40 гаруй хоногийн урт хугацааны тэнгисийн байлдааны сургуулилтын үеэр Япон улс ойрын зайнаас "аюултай" тагнуулын ажиллагаа явуулж, "өдөөн хатгасан дарамт шахалт" үзүүлсэн гэж Хятадын төрийн мэдээллийн хэрэгслээр буруутгалаа.

Хятадын төрийн төв телевиз (CCTV)-ийн мэдээлснээр, Хятадын тэнгисийн цэргийн "Ляонин" (Liaoning) нисэх онгоц тээвэрлэгч хөлөг даваа гаригт бааздаа буцаж ирсэн байна. Энэхүү урт хугацааны сургуулилтын үеэр "Японы хөлөг онгоц болон нисэх онгоцууд ойрын зайнаас тасралтгүй мөрдөн мөшгиж, тандалт хийн, өдөөн хатгасан дарамт шахалт үзүүлсэн" гэж тус телевиз мэдээлэв.

"Ляонин хөлөг онгоцны бүрэлдхүүн сургуулилтын туршид байнгын бэлэн байдалд байж, байлдааны даалгавар гүйцэтгэх сөнөөгч онгоцуудыг тасралтгүй хөөргөн, байлдааны жагсаалыг уян хатан зохицуулж, Японы аюултай үйлдлүүдийн эсрэг мэргэжлийн түвшинд хариу арга хэмжээ авсан" гэж мөн CCTV мэдээллээ.

Телевизийн бичлэгээс үзвэл, Японы Далайн өөрийгөө хамгаалах хүчний эргүүлийн онгоц болон хөлөг онгоцууд Хятадын хөлөг онгоц, нисэх онгоцны ойролцоо нисэж, аялж байжээ.

Японы Батлан хамгаалах яамнаас мэдээлэл хийхдээ, өөрийн орны Далайн өөрийгөө хамгаалах хүчний хөлөг онгоц болон онгоцууд бямба гаригт Миякогийн хоолойгоор дамжин Зүүн Хятадын тэнгис рүү аялсан "Ляонин" болон түүнийг дагалдан яваа хоёр хөлөг онгоцыг мөрдөн мөшгисөн болохыг баталжээ.

Батлан хамгаалах яам зургаадугаар сарын 1-нд мэдээлэл хийхдээ уг бүлэг тавдугаар сарын сүүлээр Филиппиний зүүн талын Номхон далайд сургуулилт хийсэн гэж мэдэгдэж байсан ч үүнээс хойш даваа гариг хүртэл тэдний үйл ажиллагааны талаар ямар нэгэн мэдээлэл өгөхгүй чимээгүй байсан юм.

Японы Засгийн газар Бээжингийн зүгээс гаргасан "дарамт шахалт үзүүлсэн" гэх буруутгалын талаар яаралтай хариу тайлбар өгөөгүй байна.

Токиогийн зүгээс Бээжинтэй харилцаагаа улам хурцатгахаас сэргийлж, хянуур боловч тууштай байр суурь баримталж байна. Саяхан Ерөнхий сайд Санаэ Такаичи Тайванийн хямралын үеэр Япон улс цэргийн интервенц хийж магадгүй гэж мэдэгдсэний дараа хоёр орны харилцаа сүүлийн хэдэн арван жилийн хамгийн доод цэгтээ хүрээд байсан юм. Хятад улс Тайванийг өөрийн газар нутаг гэж үздэг бөгөөд шаардлагатай бол хүч хэрэглэн хяналтдаа авахаа мэдэгдсээр ирсэн.

Өнгөрсөн оны яг энэ үед Японы Батлан хамгаалах яам Номхон далайн баруун хэсэгт байсан Хятадын хоёр нисэх онгоц тээвэрлэгч хөлөг онгоцны хөдөлгөөнийг харуулсан зургийг олон нийтэд ил болгох шийдвэр гаргаж байв. Энэ нь Бээжингийн тэнгисийн цэргийн үйл ажиллагаанд олны анхаарлыг хандуулах зорилготой байсан бөгөөд харин энэ удаад Такаичигийн засаг захиргаа харилцааг улам хурцатгахгүйн тулд Хятадын флотын хөдөлгөөнийг зориуд нууцалсан уу гэдэг нь тодорхойгүй байна.

Хятадын цэргийн баруун Номхон далай дахь хөдөлгөөн Япон улсыг түгшээж байгаа бөгөөд санамсаргүй мөргөлдөөн эцэстээ том хэмжээний дайн болж хувирах вий гэсэн болгоомжлолыг төрүүлж байна.

Өнгөрсөн арванхоёрдугаар сард "Ляонин" хөлгийн сөнөөгч онгоцууд Окинава мужийн зүүн өмнөд хэсэгт, олон улсын усан хил дээр Японы Агаарын өөрийгөө хамгаалах хүчний онгоц руу радарын түгжээг (radar lock) хоёр удаа хийсэн. Өнгөрсөн зун Хятад улс мөн хоёр нисэх онгоц тээвэрлэгч хөлгөө Номхон далайн баруун хэсэгт илгээж, Японы нисэх онгоцны ойролцоо байлдааны онгоцуудаа хэд хэдэн удаа нисгэсэн нь мөргөлдөх эрсдэл үүсгэсэн гэж Токио мэдэгдэж байв.

CCTV-ийн мэдээлснээр, Хятадын флот энэ удаагийн сургуулилтаар Өмнөд Хятадын тэнгис, Номхон далайн баруун хэсэг болон бусад агаар, тэнгисийн бүсэд ажиллагаа явуулж, урьдчилан сэргийлэх, тандалт судалгааны иж бүрэн системийг туршжээ. Мөн тус бүлэг Номхон далайн баруун хэсэгт амфиби довтолгооны хөлөг онгоцны бүлэгтэй хамтарсан сургуулилт хийсэн бөгөөд энэ нь олон нийтэд ил болсон анхны ийм төрлийн хамтарсан сургуулилт боллоо.

"Ляонин" флотын энэхүү ажиллагаа нь Япон улсыг "шинэ милитаризм" явуулж байна хэмээн Хятадын зүгээс шүүмжлэлээ ширүүсгэж буй үетэй давхцаж байна. Харин Токио батлан хамгаалахын зардлаа нэмэгдүүлж, холбоотон орнуудтайгаа хамтын ажиллагаагаа өргөжүүлж байгаагаа хамгаалж, Хятадын өөрийнх нь цэргийн хүчээ зузаатгаж буй үйлдлийг буруутгаж байгаа юм.