УИХ-ыг барьцаалсан улс төрийн ГУРВАЛ

Намрын чуулганы хөшиг нээгдэж, төрийн тайзнаа “Тамгагүй төр” тавигдаж эхэллээ. Гол найруулагчид нь Л.Оюун-Эрдэнэ, Д.Амарбаясгалан, О.Цогтгэрэл нар. Тэдний хувьд улсын төсөв болон Хууль зүйн сайдын томилгоог бойкотлож, парламентын үйл ажиллагааг гацаав. Учир нь, тэдэнд Н.Учралын томилгоог болон төсвийг гацаах амин чухал шалтгаан бий.

С.Амарсайхан Хууль зүйн дотоод хэргийн сайд болсноор цагаан байрны цагаан захтнуудын нүүрсний хулгай болон авлига, луйврын хэргүүд хав дарагдсан. Харин Н.Учрал С.Амарсайханыг албан тушаалаас нь чөлөөлснөөр тэд Г.Тэмүүлэнтэй хавтаст хэргүүдээ наймаалцахаар чуулганы хуралдааныг бойкотлох болсон нь тэнэг хүнд ч ойлгомжтой болсон. Тиймээс Булганы бүлэглэл өнөөдөр Төрийн ордонд тэвдэнгүй гүйлдэж, сахал Ж.Бат-Эрдэнийн өрөөнд ахин булагнасан нь ганц айраг, архи эргүүлсэн асуудал биш байх. Намын дарга Н.Учралтайгаа Хууль зүйн сайдын томилгоогоор хэргээ наймаалцахаар уулзалт хийсэн ч үр дүнд хүрээгүй байна. Н.Учралын зүгээс хэрэг наймаалцахгүй, ирцээ өөрөө бүрдүүлнэ гэж хэлээд гарчээ.

Түүнчлэн өнгөрсөн амралтын өдрүүдэд МАН, АН-ынхан хэд хэдээрээ энд, тэнд уулзалджээ. Л.Оюун-Эрдэнэ, Д.Амарбаясгалан нарын зүгээс О.Цогтгэрэлтэй уулзаж, чуулганы бойкотыг үргэлжлүүлэхээр тохирчээ. Тэгэхээр чуулганы хуралдаан хэр хугацаанд гацахаас тэд ямар тохироо хийсэн нь харагдана.