В.Залужный: Украин НАТО-д хэзээ ч элсэхгүй

The Kyiv Independent

Украин улс олон жилийн турш эвсэлд нэгдэхийг эрмэлзэж байгаа ч НАТО-гийн гишүүн хэзээ ч болохгүй гэж Их Британид суух Украины Элчин сайд, зэвсэгт хүчний ерөнхий командлагч асан Валерий Залужный 8-р сарын 3-нд мэдэгдэв.

Киев хотод болсон Украины элчин сайд нарын уулзалтын үеэр Залужный НАТО-гийн цэргийн стандартууд орчин үеийн дайны бодит байдлаас хоцрогдсон гэж үзэж, Украин улс цаашид Европын аюулгүй байдлын шинэ эвслүүдийг дагах ёстой гэсэн санааг дэвшүүлэв.

"Би НАТО-гийн стандартыг нэвтрүүлэхийн тулд биечлэн ажиллаж, жил бүр бид НАТО-д яг нэгдэх гэж байна гэсэн яриаг сонсдог байсан. Харамсалтай нь бид хэзээ ч элсэхгүй" гэж Залужный хэлжээ.

Залужныйгийн хэлснээр гол саад бэрхшээлүүдийн нэг нь НАТО-гийн стандартууд хуучирсанд оршиж байна. "Украины Зэвсэгт хүчин хөгжлийн одоогийн түвшингээ харгалзан үзвэл Дэлхийн II дайны номлолыг баримталдаг байгууллагад нэгдэх боломжгүй" гэж тэрбээр нэмж дурджээ.

Түүнчлэн тус альянс Оросын Холбооны Улсын түвшний талд нь хүрэхийн тулд шинэ стандартуудыг нэвтрүүлэхэд ойролцоогоор 12 жил шаардагдана гэж тэрбээр онцлов. Залужный НАТО-гийн гишүүнчлэлийн оронд Украин улс бүс нутгийн аюулгүй байдлын шинэ зохицуулалтад анхаарлаа хандуулах ёстой гээд: -"Украин цаашид бий болох блок, эвслүүдтэй хөл нийлүүлэн алхана. Бид Европын цэргийн аюулгүй байдлын блокийн тухай ярих магадлалтай байна" гэжээ.

Гадаад хэргийн яамны хэвлэлийн төлөөлөгч Георгий Тихий Залужныйгийн хэлсэн үгийг залруулахдаа элчин сайдын бүрэн хариулт НАТО-д биш, голчлон Хамтарсан шуурхай хүчинд (JEF) хамааралтай болохыг тодотгожээ.

Залужный Евро-Атлантын интеграцийн талаарх хэлэлцүүлгийн үеэр JEF-д Украины оролцооны талаарх асуултад хариулж, улмаар байгууллагын талаарх сэтгэгдлээ ерөнхийд нь өргөжүүлэн ярьсан юм. "Аливаа буруу ойлголтоос урьдчилан сэргийлэхийн тулд бид албан ёсны байр сууриа дахин баталгаажуулж байна. Хойд Атлантын эвсэлд нэгдэх Украины чиглэл өөрчлөгдөөгүй хэвээр байна" гэж Тихий хэлэв.

Украины Үндсэн хуульд НАТО-гийн гишүүнчлэлийг стратеги зорилго гэж заасан байдаг. Ерөнхийлөгч Владимир Зеленский өмнө нь хэрэв АНУ болон Европын түншүүдээс аюулгүй байдлын баталгаа авбал Киев тус эвсэлд нэгдэхээ хойшлуулж магадгүй гэж мэдэгдэж байсан юм.

Залужный 2021 оноос 2024 он хүртэл Украины Зэвсэгт хүчний ерөнхий командлагчаар ажиллаж, олон нийтийн өндөр дэмжлэгтэйгээр тус албан тушаалаас буусан. Тэрбээр Украины дараагийн ерөнхийлөгчийн сонгуульд нэр дэвших хүлээлттэй байгаа билээ. 2026 оны 6 сард явуулсан санал асуулгаар иргэдийн 32% нь Зеленскийг дэмжсэн бол 16% нь Залужныйгийн төлөө санал өгнө гэжээ.