Украины мэдээ: ОХУ цөмийн зэвсгээр сүрдүүлэв

Нэг.

Өнгөрсөн дөрөвдүгээр сард Москвагийн шүүхээс Дюссельдорфын карнавалын тэрэг бүтээгч Жак Тиллид эчнээгээр 8 жил 5 сарын хорих ял оноосон бөгөөд энэ мягмар гаригт уг хэргийг давж заалдах шатны шүүх хурал эхлэхээр товлогджээ. Москва хотын Давж заалдах шатны зөвлөлийн шүүх хурал өглөө эхлэхээр товлогдсон ч давж заалдах хүсэлтийг прокурор гаргасан уу, эсвэл өмгөөлөгчийн талаас уу гэдгийг мэдэхгүй байгаагаа Тилли шүүх хурлын өмнө Германы хэвлэлийн агентлагт (dpa) ярьжээ. Томилогдсон өмгөөлөгч нь түүнийг цагаатгах хүсэлт гаргасан бол прокурорын зүгээс өөрсдийн яллах дүгнэлтийг хэвээр үлдээхийг шаардсан байна. Энэхүү шүүх хурлын явцыг Москва дахь Германы Элчин сайдын яамны ажилтнууд ажиглаж байгаа аж.

Москвагийн шүүхээс өнгөрсөн дөрөвдүгээр сард шийдвэр гаргахдаа, Тиллиг Дюссельдорфын "Сарнайн даваа гариг" (Rosenmontagszug)-ийн парадын үеэр гаргасан үзүүлбэрээрээ Оросын шашныг доромжилсон, мөн Оросын зэвсэгт хүчний талаар худал мэдээлэл тараасан гэж буруутгасан юм. Тилли Кремлийн тэргүүн Владимир Путин болон түүний тушаалаар эхлүүлсэн Украины дайныг хошин шог, ёгт хэлбэрээр олонтоо шүүмжилж байсан бөгөөд Оросын үнэн алдартны шашны тэргүүн Патриарх Кириллийг ч мөн элэглэж байжээ. (dpa)

Хоёр.

Украины зүүн хойд нутаг руу Оросын талаас цохилт өгсний улмаас дөрвөн хүн амь үрэгдсэн талаар албаны эх сурвалж мэдээллээ. Орос улс Чугуев хот руу халдсан бөгөөд халдлагын улмаас гурван эмэгтэй, нэг эрэгтэй амь үрэгдсэн гэдгийг Харьков мужийн захирагч Олег Синегубов мягмар гаригт Телеграм сувгаараа дамжуулан мэдэгдэв.

Тэрбээр цааш нь "Цохилтын улмаас гал түймэр гарч, хамгийн багадаа 18 тээврийн хэрэгсэл болон хэд хэдэн орон сууцны барилга сүйдсэн" хэмээн нэмж дурджээ. Мөн Синегубовын мэдээлснээр Харьков хотод болсон дайралтын үеэр 15 хүн шархадсан байна. (afp)

Орос болон Беларус улсууд өөрсдийн аюулгүй байдлыг хангахын тулд цөмийн зэвсгийг оролцуулаад боломжит бүхий л хэрэгслийг ашиглахад хэзээд бэлэн байна гэж Оросын тал мэдэгдлээ. Энэ тухай Оросын Гадаад хэргийн дэд сайд Михаил Галузин "Известия" сонинд өгсөн ярилцлагадаа дурджээ. Орос улс Беларус дахь цэргийн оролцоогоо хадгалсаар байгаа бөгөөд хоёр улс тогтмол хамтарсан бэлэн байдлын шалгалт хийдэг болохыг нэмж хэлжээ. Хоёр улсаас бүрдэх Холбооны улсын аюулгүй байдлыг хамгаалахын тулд тасралтгүй бэлэн байдалд ажиллаж байна гэж тэрбээр мэдэгджээ. (rtr)

Гурав.

Украины Ерөнхийлөгч Володимир Зеленский Европын түншүүдтэйгээ уулзсаныхаа дараа АНУ-ын хэлэлцээрийн төлөөлөгч Стив Виткофф, Жаред Кушнер нартай Украины дайныг зогсоох дипломат санаачилгуудыг идэвхжүүлэх талаар ярилцсанаа мэдэгдэв. Тэрбээр АНУ-ын Ерөнхийлөгч Дональд Трампын хүргэн Ж.Кушнер болон тусгай элч С.Виткофф нарт хандан, ирэх долоо хоногт Оросын түрэмгийллийн дайныг зогсоох дипломат харилцааг сэргээхийн тулд боломжит бүхий л хэлбэрээр идэвхтэй ажиллахад бэлэн байгаад нь талархал илэрхийлжээ.

Молдав улсын Кишинёв хотын нисэх онгоцны буудалд түр саатах үедээ хийсэн энэхүү утасны ярианы үеэр "Их 7"-ийн дээд хэмжээний уулзалт болон "зургадугаар сард болох бусад үйл явдлууд"-ын талаар мөн хэлэлцсэн байна. Өнгөрсөн ням гаригт ХБНГУ-ын Канцлер Фридрих Мерц, Францын Ерөнхийлөгч Эммануэль Макрон, Их Британийн Ерөнхий сайд Кир Стармер, В.Зеленский нар Лондон хотноо уулзаж, Орос улсад хандан гал зогсоож, хэлэлцээрийн ширээний ард суухыг уриалсан юм. (dpa)