Вьетнамын жуулчдыг татах тактик: Дахин ирэх хүслийг төрүүлэхүйц сэтгэгдэл!

Fortune сэтгүүл Вьетнамыг Зүүн өмнөд Азийн аялал жуулчлалын шинэ төв цэг гэж тодорхойлж, нэн ялангуяа Фукуок болон Са Па зэрэг байгалийн үзэсгэлэнт газруудыг чиглэсэн жуулчны урсгал эрчимжиж байгааг онцолжээ. Тус улсын аялал жуулчлал ийн үсрэнгүй хөгжихөд төр засгийн нээлттэй бодлого болон дэлхийн түвшний аялал жуулчлалын экосистемийг бүрдүүлэхэд хувийн хэвшлийн гүйцэтгэх үүрэг оролцоо нэмэгдсэнтэй холбоотой  болохыг онцолсон байна.

Олон жилийн турш Тайланд улс Зүүн Өмнөд Азид ирж буй олон улсын аялагчдын хувьд бараг л хамгийн анхны сонголт байсаар ирсэн. Гэвч Fortune сэтгүүлийн мэдээлснээр энэхүү дүр зураг эрчимтэй өөрчлөгдөж байна. 2025 онд Вьетнам улс түүхэндээ анх удаа гадаадын 21 сая гаруй жуулчдыг хүлээн авсан нь өмнөх оныхоос 20%-иар өсөж, тус улсын аялал жуулчлалын салбарт шинэ дээд амжилт тогтоожээ. Ялангуяа, Вьетнам улс Тайландыг гүйцэж түрүүлэн, Хятад жуулчдын хамгийн их зочилдог газар болсон бөгөөд 5.3 сая хятад жуулчилсан байна.

Жуулчдын тоо өсөхөөс гадна аялал жуулчлалын салбар ашиг орлого нь Вьетнамын ДНБ-ий орлогын бараг 10%-ийг бүрдүүлэх болжээ. 2026 онд ойролцоогоор $41 тэрбумын орлого олох төлөвтэй байна.

Сингапур дахь "ISEAS-Yusof Ishak" хүрээлэнгийн Вьетнам судлалын хөтөлбөрийн ахлах ажилтан, зохицуулагч Ле Хонг Хиеп доктор Fortune сэтгүүлд өгсөн ярилцлагадаа Вьетнам улс бүс нутагтаа тэргүүлэх чиглэл болохын тулд Тайланд, Малайз улсуудтай шууд өрсөлдөж байна гэдгийг дурджээ.

Энэхүү өсөлтийн эрч хүч зөвхөн томоохон хотуудад төвлөрөхөө больж, орон нутгийн өвөрмөц онцлог бүхий газруудад өргөжин тэлж байгаа гэнэ. Fortune-ийн эш татсан "Klook" платформын мэдээллээр 2025 онд Фукуок болон Са Па руу аялсан жуулчдын тоо хоёр дахин нэмэгдсэн байна. "Klook" компанийн Корпорацын хөгжил хариуцсан дэд ерөнхийлөгч КС Сүүний хэлснээр, аялагчид байгаль болон орон нутгийн соёлтой нягт холбоотой газруудыг илүүд үзэх нь улам бүр нэмэгдсээр байна.

Арав хүрэхгүй жилийн дотор Фукуок арал 2016 онд 1.4 сая орчим жуулчин хүлээн авдаг байснаа 2025 онд 8.1 сая гаруй болж өсжээ. Өнгөрсөн онд Са Па хот 4.3 сая орчим жуулчин хүлээн авсан бөгөөд аялал жуулчлалын орлого нь 11 дахин ихэссэн байна. Үүний зэрэгцээ Да Нанг хот нь амралтын газар, энтертайнмент үйлчилгээ болон олон улсын арга хэмжээнүүдийн баялаг системээрээ эрч хүчтэй аялал жуулчлалын төв гэдгээ баталсаар байна.

Fortune сэтгүүлийн үзэж байгаагаар, эдгээр өсөлтийн үзүүлэлтүүдийн ард хоёр чухал хөдөлгөгч хүч байна. Тэр нь төрийн нээлттэй бодлого аялал жуулчлалын бүсүүдийг хөгжүүлэхэд хувийн хэвшлийн хүчтэй оролцоо юм.

Нэгдүгээрт, визний бодлого. Вьетнам улс визгүй зорчих орнуудын тоог 39 улс, нутаг дэвсгэр болгон өргөжүүлж, зарим гол зах зээлийн орнуудын байх хугацааны хязгаарыг уртасгасан нь олон улсын аялагчид Вьетнамыг сонгоход илүү хялбар болгосон байна. "Hilton" группийн Зүүн өмнөд Ази хариуцсан дэд ерөнхийлөгч бөгөөд бүсийн дарга Александра Мюррей нь Fortune сэтгүүлд хэлэхдээ, хөнгөвчилсөн визний бодлого нь аялагчдад, ялангуяа урт хугацааны амралтын аялал хийх шийдвэрийг илүү хурдан гаргахад тусалдаг гэжээ. Жишээ нь, Фукуок арал олон улсын жуулчдад 30 хүртэл хоногоор визгүй зорчих эрхийг олгож байгаа нь гадаадын жуулчдын хувьд нээлттэй үүд хаалга болсон юм.

Хоёрдугаарт, тээврийн дэд бүтэц болон олон улсын холболт:. Шинэ нислэгийн чиглэлүүд тасралтгүй нээгдэж, Фукуок дахь APEC 2027 дээд хэмжээний уулзалтад зориулсан барилга байгууламжууд зэрэг дэд бүтцийн томоохон төслүүд хэрэгжиж байна. Эдгээр бүтээн байгуулалтууд нь Вьетнам улс амралт зугаалга, MICE (бизнес уулзалт, хурал зөвлөгөөн) болон эрүүл мэндийн аялал жуулчлал зэрэг өндөр өртөгтэй жуулчдын урсгалыг татах үндэс суурийг тавьж байна.

Гэсэн хэдий ч Fortune сэтгүүл дэд бүтэц, бодлого нь зөвхөн шаардлагатай нөхцөлүүд гэдгийг тэмдэглэжээ.

Аялал жуулчлалын бүсийн амжилт нь зөвхөн жуулчдыг авчрахдаа биш, харин тэднийг илүү урт хугацаагаар саатах, илүү их мөнгө зарцуулах, дахин ирэх хүслийг төрүүлэхүйц сэтгэгдэл, туршлагыг бий болгоход оршдог.

Энд л хувийн хэвшлийнхэн байгалийн баялгийг зүгээр нэг ашиглахаас татгалзаж, аялал жуулчлалын бүрэн хэмжээний экосистемийг бий болгосноороо тод мөрөө үлдээж байна.

Фукуок үүний тод жишээ юм. Өмнө нь зөвхөн байгалийн үзэмжээрээ алдартай байсан энэ арлын өмнөд хэсэг нь одоо асар том хэмжээний аялал жуулчлал, амралт зугаалгын экосистем болон хөгжжээ. Бараг арав гаруй жилийн хугацаанд "Sun Group" нь дэлхийн хамгийн урт гурван утаст кабель тээврийн систем болох "Sun World Hon Thom", "Sunset Town", "Kiss Bridge" (Үнсэлтийн гүүр), мультмедиа шоу болон орой бүрийн салютын үзүүлбэрүүдээрээ энэ бүс нутгийн өнгө төрхийг өөрчилсөн байна.

Үүнээс гадна "JW Marriott Phu Quoc", "New World Phu Quoc", "La Festa Phu Quoc – Curio Collection by Hilton" зэрэг олон улсын зочид буудлын брэндүүд орж ирсэн нь үйлчилгээний чанарыг улам сайжруулжээ. Дотоодын хөгжүүлэгчид болон дэлхийн тэргүүлэгч зочид буудлын менежментийн брэндүүдийн энэхүү нэгдэл нь олон улсын аялагчдын анхаарлыг татах гол хөшүүрэг болж байна.

Са Па хотын хувьд эргэлтийн цэг нь зөвхөн Фансипан кабель тээвэр биш, харин тухайн газрын үнэ цэнийг шинээр тодорхойлсонд оршино. "Sun World Fansipan Legend" цогцолбор болон "Hotel de la Coupole – MGallery Sa Pa" зочид буудал нь Са Па хотыг зүгээр нэг явган аяллын (trekking) бүс байсныг нь өөрчилж, дөрвөн улирлын турш амрах, соёл болон танин мэдэхүйн аялал хийх төв болгожээ.

Вьетнамын бизнесүүд аялал жуулчлалын бүсийг хөгжүүлээд зогсохгүй олон улсын корпорацуудтай түншлэлээ өргөжүүлж байна. Fortune сэтгүүл "Sun Group"-ийн Сингапурын "Changi Airport Group"-тэй хамтран хэрэгжүүлж буй Фу Куок олон улсын нисэх онгоцны буудлыг өргөтгөх төслийг жишээ болгон дурджээ. Фу Куок хотод болох APEC 2027 уулзалтын өмнө энэхүү хөрөнгө оруулалт болон бусад олон төслүүдийг түргэсгэж байна. Александра Мюррейн хэлснээр, Вьетнамд аялал жуулчлалын томоохон төслүүдийг хэрэгжүүлж буй хурд нь түүний "Ойрхи Дорнодод ч харж байгаагүй" тийм өндөр түвшинд байна.

Товчхондоо,  Вьетнам улс хөгжих явцдаа бусад орны сургамжаас суралцаж, тогтвортой бөгөөд урт хугацааны үр дүнд хүрэхийн тулд олон улсын шилдэг туршлагуудыг анхааралтай судалж, хэрэгжүүлж байна.