2025 оны онцлох амттан: Дубай шоколад

2025 оны онцлох хүнсний нэгээр The New York Times сонин дубай шоколадыг нэрлэжээ. Ангаахай самрын өтгөн нухашны хавчуургатай сүүн шоколадыг Дубайн Fix Dessert Chocolatier анх 2021 онд худалдаанд гаргажээ. Компанийн эзэн Сара Хамуда энэхүү амттаны орцыг гаргасан бөгөөд худалдаанд гараад төдийлөн олонд түгээгүй байж байгаад 2023 оноос компанийн эзэн Сара Хамуду болон сошиал сүлжээнд олон дагагчтай инфлюенсерүүд рекламдаж эхэлсэний дараа “дубай шоколад” нэрээр танигдаж эхэлсэн. Ялангуяа 2023 оны сүүлээр алдартай хоолны блогер Мария Вехер Tik Tok хаягаараа рекламдсанаас хойш эрчийг авсан.

Дубай шоколадны хавчуурга нь дорнын өвөрмөц амтыг санагдуулдаг. Зарим хүн араб, Дундад Азийн орнуудын уламжлалт амттан болох халваны амттай гэдэг.

2024 онд Европ тэр аяараа дубай шоколадаар өвчилсөн гэж хэлж болно. Дараа нь дэлхий даяараа дубай шоколадаар өвчилж, амтлах юмсан гэсэн хүслийг өдөөсөн. Эрэлтийг дагаад дууриамал шоколадыг дэлхийн өнцөг булан бүрт олноор үйлдвэрлэх болсон. Гар аргаар гэртээ үйлдвэрлэж, онлайнаар худалдаалж байгааг олж болно.

Илчлэг өндөртэй учраас зүрх судасны өвчин, мөн чихрийн шижинтэй хүмүүс ихээр идэх нь сөрөг нөлөө үзүүлж болохыг эмч нар анхааруулдаг. 100 гр дубай шоколаданд 51 гр нүүрс ус агуулагддаг.

Нэг ширхэг нь $7-8-аар үнэлэгдэж байгаа нь жинхэнэ дубай шоколадны хавчуургыг гар аргаар хийдэгтэй холбоотой. Дубай шоколадны эрэлт нэмэгдсэнээр ангаахай самрын эрэлт 2023 оноос хойш дэлхий даяар нэмэгджээ.

Европын холбооны ястай ангаахай самрын импорт 2024 онд өмнөх 2023 онтой харьцуулахад 30 орчим хувиар өсч, үнийн дүнгийн хувьд 1 тэрбум еврод хүрчээ. Энэ эрэлтийг дагаад ангаахай самрын тариалалт мөн нэмэгдсэн байна. Ангаахай самар нь халуун уур амьсгалтай газар, бусад ургамлыг түрж ургадаг онцлогтой. 2017 оноос хойш Испани ангаахайн тариалалтаа эрс буюу 5 дахин нэмэгдүүлжээ.

Ангаахай самар нь халуун уур амьсгалтай газар явдал чирэгдэл багатай зохицон ургах чадвартай ч эрэлт нэмэгдсэнээс үүдэн ургацаа нэмэгдүүлэх сонирхол бий болжээ. Илүү ургац авахын тулд усжуулах шаардлагатай. Жишээ нь, 1 кг ангааха самар авахын тулд 10 мянган литр ус хэрэгтэй байдал бол 1 кг арахист 2800 литр ус хэрэгтэй бөгөөд арахис тариалж буй тариаланчид нэмэлт усжуулалт хийдэггүй гол төлөв борооны ус байхад хангалттай байдаг байна.