АН-ын бүлгийн гишүүд зөвлөхүүдээ ад үзэх болжээ

МАН ба МАНЖ мафийн зодооноос болж, АН-ын бүлгийн гишүүд хүртэл зөвлөхүүдээ буруутгаж, зарим гишүүн тэднийг ажлаа өгөхийг шаардах болсон байна. Тодруулбал, ард түмний болон намын мандатгүй байж бүлгийн шийдвэрт нөлөөлж байгааг нь О.Алтангэрэл нарын гишүүд эсэргүүцэж байгаа гэнэ. Тус намын бүлгийн өчигдрийн /2025.12.01/ ээлжит хуралдаанаар энэ асуудлыг хөнджээ. АН-ын бүлэгт 11 хүн зөвлөдөг.

Ахлах зөвлөх нь М.Чимэддорж. Тэрбээр улс төрийн шийдвэрүүдэд илүү оролцоотой байдаг бол Д.Амарбаясгалан хуулийн зөвлөхүүдийн ахлагчаас гадна намын байгуулалтын газрын даргаар томилогдсон. А.Батпүрэв эдийн засгийн зөвлөхүүдээ ахалдаг. Тэд сүүлийн үед бүлгийн шийдвэрт хэт нөлөөтэй, хэт оролцоотой байгаа нь бүлгийн зарим гишүүнээс шүүмжлэл хүртэх болсон байна.

Нэгд, өнгөрсөн зун “Огцрох амархан” жагсагчдын талд зогссон, Л.Оюун-Эрдэнийн эсрэг бүлгийн гишүүддээ ил, далдаар нөлөөлсөн, үүнээс болж Ерөнхий сайдаас огцруулах ажиллагаанд АН оролцсон гэж буруутгаж байгаа аж. Дашрамд дурдахад, Л.Оюун-Эрдэнэд итгэл үзүүлэх асуудлыг хэлэлцсэн УИХ-ын чуулганы хуралдаанд АН оролцохгүй гэж бүлгийн шийдвэр гаргасан байдаг. Үүнээс болж, Л.Оюун-Эрдэнэ огцорсон, АН засгаас гарсан. АН засгаас гарснаар олон хүн ажилгүй болсон. Иймээс огцорсон сайд нар багагүй бухимдалтай яваа бололтой. МАН-ын Засгийн газар АН хамтрахгүй, сөрөг хүчнээ хийхээ зарласан. Үүнд ч тус намын бүлгийн зөвлөхүүд нөлөөлсөн байх талтай. Түүнчлэн өнгөрсөн аравдугаар сард өрнөсөн Д.Амарбаясгалан, Г.Занданшатар нарыг огцруулах асуудалд хоёуланг нь явуулна гэсэн шийдвэрийг АН-ын бүлэг гаргасан нь зөвлөхүүдийнх нь өгсөн зөвлөгөө гэх. Үнэндээ ч гишүүдээсээ илүү эрх мэдэлтэй зөвлөхүүд гэж хаана ч байхгүй. МАН-ын бүлгийн зөвлөхүүд ч “том толгой” гаргадаггүй. Атал АН-ын бүлгийн зөвлөхүүд “томрох” болсон нь гишүүдийнх нь дургүйг хүргэж байгаа аж.

Бүлгийн зарим гишүүд зөвлөхүүдээ ад үзэх нэг шалтгаан нь тэднийг ирээдүйн улс төрийн өрсөлдөгчөө гэж харж байж болох. Ямар ч байсан зөвлөхүүдийнхээ том эрх мэдлийг хязгаарлахыг тэд бүлгийн даргаасаа шаардах болсон байна. Мөн О.Цогтгэрэл намын дарга, бүлгийн даргаа давхар хашиж буй нь Улс төрийн намын тухай хууль болон  АН-ын дүрэм талаасаа ямар нэгэн асуудалгүй гэж зөвлөхүүд нь ил, далдаар нөлөөлөл үзүүлж буйг үгүйсгэх аргагүй юм.

Х.ДАГИНА