Банкны салбар ₮2.5 их наядын ногоон зээл олгоод байна

2026 оны 1 дүгээр улирлын байдлаар банкны салбар нийт ₮2.54 их наядын ногоон зээлийг олгоод байна. Энэ нь нийт зээлийн 5.7%-ийг эзэлж байна. Тайлант улирлын эцсийн байдлаарх нийт олгосон зээлийн жигнэсэн дундаж хугацаа төгрөгийн хувьд 62.2 сар, гадаад валютын хувьд 45.6 сар байв. Харин жигнэсэн дундаж хүү төгрөгийн 14.3%, валютынх 10.9% байна.

Нийт олгосон ногоон зээлийн 58%-ийг эрчим хүчний хэмнэлттэй төсөл, 2.9%-ийг ногоон барилгад, тогтвортой хөдөө аж ахуй, газар ашиглалт, ой эко аялал жуулчлалын салбарт 18.2%-ийг, 9%-ийг сэргээгдэх эрчим хүчний салбар, 7%-ийг карбон бага тээврийн салбарт олгосон зээл эзэлж байна.

Монгол Улсын ногоон тогтвортой санхүүжилтийг хөгжүүлэх, ногоон таксаномигийн зорилтын хүрээнд 2030 он гэхэд банкны салбарт эзлэх ногоон зээлийн хувь хэмжээг 10%-д хүргэх зорилт дэвшүүлж буй билээ. Мөн Монголбанкны Ерөнхийлөгчийн холбогдох тушаал, журмаар зарим ногоон зээлийн хугацааг 30-60 сар болгох шийдвэрийг гаргасан. Мөн ногоон зээлийн ангилалд цахилгаан тээврийн хэрэгслийн зээлийг хамруулахаар болсон. Ингэснээр зээлдэгчийн сарын төлбөр 40 орчим хувиар буурах, банкнуудын ногоон зээл олгох хүсэл, эрмэлзлийг нэмэгдүүлэхэд чухал нөлөөтэй алхам болсон юм.