Ч.Хүрэлбаатар: Хулгайчаас салж чадаж байгаа бол зөв замд орж байгаа юм байна

Ардчилсан намын 18 дугаар Их хурал гялгар, цалгар болсон. Гэхдээ Их хурлынхаа үеэр гомдол, шүүмжлэл хэлэх хүмүүс цөөнгүй байв. Тэдний нэг нь УИХ-ын гишүүн Д.Жаргалсайхан агаад УИХ-ын гишүүн Х.Баттулгатай холбоотой шүүмжлэлийг хэлж, улс төрийн зам мөр салж буйгаа зарласан. Тэрбээр “Би Х.Баттулга гишүүнтэй олон жил хамтран ажилласан. Гэхдээ сүүлийн үед улс төрийн нөхцөл байдлаас болоод түүний дарамтад орсон. Л.Оюун-Эрдэнийн Засгийн газрыг огцруулахгүй гэж кноп дарахыг Х.Баттулга дарга надаас шаардсан. Би бүлгийнхээ шийдвэрийг дагана гэхэд “Үгэнд ор, үгүй бол Баянхонгорт байхгүй болгоно” гэсэн. Үүнийг манай намын дарга нар ч мэдэж байгаа. П.Нүрзэд ч мэднэ. Баянхонгорын Ардчилсан намын дотоод сонгууль маш хууль бус болсон. Баримт нотолгоог нь гаргаж өгсөн. Нэг хүнийг 3 сая төгрөгөөр худалдаж авсан” болохыг намынхаа төлөөлөгчдөд дуулгасан. УИХ-ын гишүүн Д.Жаргалсайханы шүүмжлэлтэй холбоотойгоор Сангийн сайд асан Ч.Хүрэлбаатар нүүр номдоо “Хулгайчаас салж чадаж байгаа бол зөв замд орж байгаа юм байна” гэж жиргэсэн. Ямартай ч Л.Оюун-Эрдэнийн Засгийн газар бол Женко.Баттулгын Засгийн газар байсныг түүний хамтран зүтгэгчид ийнхүү нотлох болсон юм.

Б.БАТ