Д.Амарбаясгалангаас болж төрийн ажил дахин гацав

Дэлхий даяар эдийн засгийн хямрал нүүрлэж байхад МАН-ын эрх мэдлийн талцлаас болж, Монгол Улсын төрийн ажил тэг зогсолтод орлоо. Учир нь, УИХ-ын даргаар С.Амарсайханыг тавиулна гэж Д.Амарбаясгалангийн бүлгээс МАН-ын дарга, Ерөнхий сайд Н.Учралыг шахалтад оруулсан гэх мэдээлэл байна.

С.Амарсайханыг Монгол Улсын Шадар сайдаар ажиллаж байх үед онцгой байдлын таван албан хаагч амиа алдсан. Мөн онцгой байдлын ажилтнууд улаан гараараа түймэртэй ноцолдож явахад С.Амарсайхан нисдэг тэрэг хөлөглөөд явж байсан удаатай.

Харамсалтай нь, тэрбээр ёс зүйн хариуцлага хүлээх нь бүү хэл УИХ-ын дарга болно гэж амбицлаж яваа юм.

Түүнчлэн ковидын үед С.Амарсайханы  эхнэр нь улаан бүсээр чөлөөтэй орж гарсан асуудал үүсэхэд тэрбээр “Манай эхнэрийн ээж, аав өндөр настай. Эхнэр маань ээж, ааваа асрах гэж орсон юм билээ” гэсэн тайлбар хийж байв. Гэсэн атал 10 настай охиндоо уух ус оруулж өгье гэсэн ээжийг халдвартай бүсэд оруулахгүй гэж “харгис” шийдвэр гаргаж байсныг олон нийт мартаагүй.

Д.Амарбаясгалан өмнө нь УИХ-ын даргаас огцрохгүй гэж төрийн ажлыг гацааж байсан. Тэгвэл энэ удаад мөн л ийм бараан намтартай хүнийг УИХ-ын даргад зүтгүүлж, Монгол төрийг гацааж байна.

Х.ХАНДАА