Deal: Pizza hut сүлжээг $2.7 тэрбумаар зарна

Yum! вrands компани санхүүгийн хүндрэлтэй тулгараад байсан Pizza hut сүлжээгээ $2.7 тэрбумаар (2 тэрбум фунт стерлинг) худалдахаар болсноо албан ёсоор зарлалаа.

Хувийн хөрөнгө оруулалтын LongRange capital компани тус брэндийн Хятадаас бусад бүс нутаг дахь салбаруудыг $1.5 тэрбумаар худалдаж авахаар болсон. Тэгвэл Yum China holdings компани Хятад дахь үйл ажиллагааг нь $1.2 тэрбумаар өөрийн болгож байна.

"LongRange" болон Yum China нь Pizza hut үйл ажиллагааг цаашид амжилттай авч явж чадна гэдэгт итгэл төгс байгаагаа Yum! brands-ийн гүйцэтгэх захирал Крис Төрнер мэдэгджээ.

Америкийн түргэн хоолны соёлын бэлгэ тэмдэг болсон Pizza hut ийнхүү урт хугацааны хүндрэлтэй үеийг туулсны эцэст шинэ эзэдтэй болж байна.

Yum! brands нь АНУ дахь салбаруудынх нь борлуулалт хэдэн улирал дараалан буурсны улмаас 2025 оны 11 дүгээр сард тус брэндийг худалдах боломжийг судалж байгаагаа анх зарлаж байсан юм. АНУ-ын зах зээл нь тус сүлжээний нийт борлуулалтын 40 хувийг бүрдүүлдэг тул маш чухалд тооцогддог.

Pizza hut нь эдийн засгийн томоохон хүндрэл амсах болсонд Domino's, Papa john's, "Little caesars зэрэг өрсөлдөгч сүлжээнүүдийн ширүүн тэмцэл голлон нөлөөлжээ. Инфляцын түвшин өндөр хэвээр байгаа энэ үед тэдгээр өрсөлдөгчид хэрэглэгчдийг татахын тулд үнээ эрс хямдруулж, түрэмгий бодлого баримталсан байна.

Түүнчлэн дунд хэмжээний бүс нутгийн сүлжээнүүд ч зах зээлээс нь хумсалж эхэлжээ. Эдгээр жижиг, илүү уян хатан түргэн хоолны өрсөлдөгчид "пиццаны дайн" гэж нэрлэгдэх болсон зах зээлд хэрэглэгчдийн өөрчлөгдөж буй зуршилд илүү хурдан зохицож чадсан байна.

Үүний зэрэгцээ гуравдагч талын хүргэлтийн аппликейшнүүд эрчимтэй хөгжсөн нь зах зээлийг маш олон төрлийн шинэ сонголтоор дүүргэж, Pizza hut-ийн түүхэн давуу талыг сааруулжээ.

Pizza hut-ийг анх 1958 онд Канзас мужийн Уичита хотод ах дүү хоёр байгуулж байжээ. Харин 1977 онд "PepsiCo" компани худалдаж авсан бөгөөд улмаар 1997 онд одоогийн Yum! Brands болон бие даан үйл ажиллагаагаа явуулах болсон байна.

Өнгөрсөн оны 10 дугаар сард Yum! нь Pizza hut-ийн Их Британи дахь салбаруудыг худалдаж авсан юм. Энэ нь тус улсын хоолны газруудыг ажиллуулж байсан DC London pie компани дампуурлаа зарласны дараа болсон үйл явдал юм. Санхүүгийн дампуурлын улмаас анх 68 зоогийн газар хаагдаж, 1200 гаруй ажлын байр эрсдэлд орсон байв. Харин “аврах” хэлцлийн хүрээнд 64 орчим зоогийн газрыг авч үлдэж чаджээ.

Pizza hut бол дэлхийн хамгийн алдартай зоогийн газрын брэндүүдийн нэг бөгөөд Yum!-ийн түүхэнд гүйцэтгэсэн чухал үүргээр нь бид бахархдаг" гэж Төрнер нэмж хэлэв.

Хүндрэлтэй байгаа энэхүү салбараа бүхэлд нь худалдсанаар Yum! brands компани өөрийн үндсэн брэндүүд болох KFC болон Taco bell-д хөрөнгө, санхүүжилт, нөөц бололцоогоо чиглүүлж, үйл ажиллагаагаа оновчтой болгохыг зорьж байна.

LongRange capital болон Yum China компаниудтай хийх эдгээр хэлцлүүд нь зохицуулах байгууллагуудын албан ёсны зөвшөөрлийг авсны үндсэн дээр 2026 оны гуравдугаар улиралд багтан бүрэн дуусах төлөвтэй байна.