Дэлхийн дипломат харилцааны төв цэг ба Бээжингийн айлчлалууд!

ОХУ-ын Ерөнхийлөгч Владимир Путин БНХАУ-ын дарга Ши Жинпиний урилгаар Бээжинд хоногийн хугацаагаар айлчилна.

Энэхүү өндөр хэмжээний уулзалт нь АНУ-ын Ерөнхийлөгч Дональд Трампын Хятадад хийсэн айлчлалаас хойш долоо хоног ч хүрэхгүй хугацаанд тохиож байгаагаараа олон улсын анхаарлын төвд байна. Энэ нь дэлхийн хамгийн том хоёр эдийн засагтай орны удирдагчид сүүлийн нэг жил орчмын хугацаанд хоёр дахь удаагаа уулзсаны дараа болж буй үйл явдал юм.

Кремлийн ордноос гаргасан албан ёсны мэдэгдэлд дурдсанаар, ОХУ-ын Ерөнхийлөгчийн энэ удаагийн айлчлал нь хоёр улсын хоорондын дипломат харилцааны суурь тулгуур болдог "Сайн хөршийн харилцаа, найрамдал, хамтын ажиллагааны тухай гэрээ" байгуулагдсаны 25 жилийн ойтой давхцаж байгаагаараа түүхэн ач холбогдолтой ажээ.

Орос улс нь дэлхийн хамгийн том газрын тос үйлдвэрлэгчдийн нэг бол Хятад улс нь чулуужсан түлшний хамгийн том худалдан авагчдын тоонд зүй ёсоор ордог. Украины дайн эхэлснээс хойш Хятад улс албан ёсоор төвийг сахисан байр суурь баримталж байгаагаа мэдэгдсээр ирсэн боловч Оросын газрын тосыг үргэжлүүлэн худалдан авч, Оросын зэвсэгт хүчний ашиглаж буй иргэний болон цэргийн (давхар) зориулалттай бараа бүтээгдэхүүнийг нийлүүлсээр байгаа нь Москвагийн хувьд эдийн засгийн гол амин судас болж байна.

Владимир Путиныг Бээжинд хүрэлцэн ирэхээс хэдхэн хоногийн өмнө буюу 5 дугаар сарын 13-ноос 15-ны өдрүүдэд АНУ-ын Ерөнхийлөгч Дональд Трамп Хятад улсад айлчилсан бөгөөд энэ нь 2017 оноос хойш АНУ-ын ерөнхийлөгчийн түвшинд тус улсад хийсэн анхны албан ёсны айлчлал болсон юм. Трамп Ши Жинпинтэй уулзах үеэрээ бусад чухал сэдвүүдээс гадна Оросын Украины эсрэг хийж буй дайны асуудлыг тусгайлан хөндөж хэлэлцсэн байна.

Айлчлалынхаа дараа Трамп Хятадтай "гайхалтай" худалдааны хэлэлцээрүүдийг үзэглэж чадсанаа зарласан билээ. Цагаан ордоны албаны хүн 5 дугаар сарын 14-ний өдөр "Kyiv Independent" хэвлэлд өгсөн мэдээлэлдээ "Хоёр тал хоёр орны эдийн засгийн хамтын ажиллагааг нэмэгдүүлэх, түүний дотор Америкийн бизнесүүдэд Хятадын зах зээлд нэвтрэх боломжийг өргөжүүлэх болон манай аж үйлдвэрийн салбарууд дахь Хятадын хөрөнгө оруулалтыг нэмэгдүүлэх арга замуудыг нухацтай хэлэлцсэн" гэжээ.

Ийнхүү Бээжин хот тун богино хугацааны дотор дэлхийн бодлогыг тодорхойлогч АНУ болон ОХУ-ын удирдагчдыг дараалан хүлээн авч, олон улсын геополитикийн томоохон тоглолт, дипломат харилцааны гол төв цэг болон хувирч байна.