Education: Х.Нямбаатар VS Д.Пүрэвдагва

Л.Оюун-Эрдэнэ Ерөнхий сайдаас огцорсон ойн дээр Х.Нямбаатар албан тушаалаасаа хагацаж байна. Үнэндээ Х.Нямбаатар Улаанбаатарын захирагч уу, улсын захирагч уу гэдгээ ялгахаа больтлоо “томорсон”. Түүн шиг иргэдээ дарамталдаг, элдвээр гүтгэн доромжилдог хотын дарга урьд өмнө нь байсангүй. Х.Нямбаатар мега төсөл нэрээр мега хулгай хийсэн нь намтартаа ч, нийслэлийн түүхэнд ч “хар толбо” үлдээж байна.

Х.Нямбаатар Улаанбаатарын захирагч уу, Монгол Улсын захирагч уу гэдгээ  ялгахаа больтлоо тэрбээр өөрийн дарангуйлал тогтоосон байв. Түүний хувьд Туулын хурдны замыг эсэргүүцсэн иргэдийн эсрэг жагсаал зохион байгуулж, өөрийг нь огцруулах шийдвэр гаргасан Ерөнхий сайдыг “бацаан” гэж дуудах хэмжээнд вакумжсан нь худлаа биш.

Тиймээс Х.Нямбаатарыг огцруулсан хүн бол Х.Нямбаатар өөрөө байлаа.

Түүнээс хотын тамга шилжүүлж авсан Д.Пүрэвдагва ямартай ч том төслүүдээ эрэмбэлж, бүгдийг хийх биш чухлыг нь хэрэгжүүлнэ гэдгээ ч тов тодорхой хэлсэн. Ийнхүү Х.Нямбаатарын иргэдтэйгээ хэрүүл хийх цаг дуусч, Д.Пүрэвдагвын хэн бэ гэдгээ таниулах цаг эхлэж байна. Ингээд тэдний CV дэх боловсролыг сонирхуулъя.

CV: Х.НЯМБААТАР

Тэрбээр 1978 онд Улаанбаатар хотод төрсөн, өдгөө 48 настай. 1996 онд нийслэлийн Ерөнхий боловсролын 48 дугаар дунд сургуулийг төгссөн. 1996-2000 онд Орхон их сургуулийг эрх зүйчээр төгссөн бол 2002 онд Орхон их сургуульд Боловсрол судлалын магистр хамгаалжээ. Харин 2008 онд ДХИС-д Хууль зүйн ухааны магистрт суралцаж, 2012 онд Удирдлагын академид Төрийн удирдлагын докторант, 2017 онд ДХИС Хууль зүйн ухааны докторант болсон байна.

CV: Д.ПҮРЭВДАГВА

Тэрбээр 1990 онд төрсөн, 36 настай. 1998-2008 онд Нийслэлийн 45 дугаар сургуулийг төгсөж, 2008-2012 онд МУИС-ийн Улс төр судлалын тэнхимийг дүүргэжээ. 2015-2017 онд Австралийн Нью-Кэслийн их сургуулийг Тогтвортой хөгжлийн судалгаа магистр хамгаалсан байна.

Б.БАТ