ЕХ-ны Каллас "Оросын хавх"-нд орохоос сэрэмжлүүлэв

Европын холбооны (ЕХ) Гадаад бодлогын тэргүүн Каяа Каллас гишүүн улсууддаа хандан, Украин дахь ирээдүйн энхийн хэлэлцээнд тус холбоог хэн төлөөлөх вэ гэдэг маргаанд сатаарч, Оросын "хавх"-нд орохгүй байхыг сэрэмжлүүллээ.

Тэрбээр Киприйн Лимасол боомт хотод болсон ЕХ-ны Гадаад хэргийн сайд нарын уулзалтын үеэр сэтгүүлчдэд мэдээлэл хийхдээ: "Энэ бол Оросын зүгээс биднийг алхуулж оруулахыг хүсэж буй хавх юм. Биднийг хэн тэдэнтэй ярилцах вэ гэдгийг хэлэлцэж байх хооронд тэд хэн нь тохирох, хэн нь тохирохгүйг хэдийнэ шилж сонгоод эхэлчихсэн байна. Энэ хавх руу битгий алхаж орцгооё" хэмээн мэдэгдсэн байна.

Энэ сарын эхээр Москвагийн зүгээс ХБНГУ-ын Канцлер асан, Кремлийн найз Герхард Шредерыг зуучлагчаар санал болгосон бол Финландын Ерөнхийлөгч Александр Стубб, Европын Төв банкны ерөнхийлөгч асан Марио Драги, тэр байтугай Германы Канцлер асан Ангела Меркель нарын нэрийг ч мөн дэвшүүлээд байсан юм.

Гэвч К.Каллас эдгээр санааг нэн даруй няцааж "Хэлэлцээ гэдэг бол үргэлж багийн ажил байдаг. Тэнд “сайн цагдаа”, “муу цагдаа” ч бий, стратеги ч бий. Тухайн хэлэлцээний мөн чанар, агуулга нь хэн оролцох вэ гэдгээс хамаагүй чухал" гэжээ.

АНУ Ойрхи Дорнодын мөргөлдөөнд илүүтэй анхаарал хандуулж байгаа энэ үед Украин улс Европыг хэлэлцээний явцад илүү хүчтэй үүрэг гүйцэтгэхийг шаардаж байна.

Ерөнхийлөгч Володимир Зеленский "Европ тивийнхэн хэлэлцээнд заавал оролцох ёстой. Энэ үйл явцад Европын дуу хоолой, оролцоо хүчтэй байх нь чухал бөгөөд Европыг яг хэн төлөөлөхийг тодорхойлох нь зүйтэй" гэх байр суурийг илэрхийлсэн бий.

Гэвч Европын хувьд Вашингтоны гүйцэтгэж байсан төвийг сахисан зуучлагчийн үүргийг хүлээж авах сонирхол сул хэвээр байна. Европын холбоонй нэгэн дипломат эх сурвалж Ройтерс (Reuters) агентлагт хандан  "Бид Украиныг хэр их дэмжиж ирснээ бодвол, ЕХ хэрхэн хэлэлцээний зуучлагч эсвэл зохицуулагч болж, АНУ-ыг орлож чадахыг төсөөлөхөд бэрх байна" хэмээн нууцлан ярьжээ.

П.АРТ