“Эрдэнэс Тавантолгой”-д тогтоосон онцгой дэглэм дуусгавар боллоо

Монгол Улсын Засгийн газрын 2025 оны долдугаар сарын 9-ний өдрийн 26 дугаар тогтоолоор “Эрдэнэс Тавантолгой” ХК-д гурван сарын хугацаатай онцгой дэглэм тогтоосон.

Бүрэн эрхт төлөөлөгчийн баг борлуулалт, экспорт, тээврийг оновчтой зохион байгуулж ажилласны үр дүнд сарын дундаж борлуулалтыг 1.6 дахин, биржийн тээвэрлэлтийг 2 дахин, экспортыг 1.3 дахин, орлогыг 1.3 дахин, олборлолтыг 1.2 дахин нэмэгдүүлсэн амжилттайгаар онцгой дэглэмийн хугацаа 2025 оны аравдугаар сарын 8-ны өдрөөр дуусгавар болж байна.

Сүүлийн гурван сарын хугацаанд нийт 81 удаагийн биржийн арилжааг амжилттай хийж 392.8 сая ам.долларын үнийн дүнтэй 7.1 сая тонн нүүрс биржээр арилжааллаа. Биржийн арилжааг зохион байгуулахдаа үнслэг, дэгдэмхий гэх мэт чанараас шалтгаалж үнийн ангилалтай арилжаалдаг болсон. Ингэснээр нүүрсний чанараас шалтгаалсан маргаантай асуудал бүрэн шийдэгдэж байгаа юм.

Зогсонги байдалд байсан биржийн 29 гэрээний хэрэгжилтийг хангуулж 15 гэрээг шийдвэрлэж, 7 гэрээний хэрэгжилт үргэлжилж байна. Гэрээний хэрэгжилтийг хангуулахдаа нүүрсний үнэ өндөр байсан үеэр тооцож, компанид орж ирэх орлогын хэмжээг бууруулахгүй байх нөхцөлөөр хэлэлцээр хийлээ.

"Эрдэнэс Тавантолгой" ХК  2025 оны нэгдүгээр сард өөрийн техник хэрэгслээр  Цанхийн баруун уурхайн хойд хэсгийн олборлолтыг эхлүүлсэн. Шинэ уурхайгаас үнслэг болон дэгдэмхий чанар багатай сайн чанарын 1/3 коксжих нүүрс олборлож байгаатай холбогдуулан 15 жилийн түүхэнд анх удаа шинэ бүтээгдэхүүнээ танилцуулах “Харилцагчийн өдөрлөг” арга хэмжээг есдүгээр сарын 27-ны өдөр Өмнөговь аймгийн Цогтцэций сум дахь салбар уурхайд зохион байгуулсан. Тус арга хэмжээнд ирсэн БНХАУ-ын худалдан авагч компаниудад уурхайн үйл ажиллагаа, шинэ бүтээгдэхүүний мэдээллийг танилцуулж санал болгосон.  Шинээр эхлүүлсэн уурхайн талбайгаас олборлосон сайн чанарын 1/3 коксжих нүүрсний анхны арилжаа  аравдугаар сарын 6-ний өдөр  амжилтай болж 160 мянган тонн 1/3 коксжих нүүрсийг 15.2 сая ам.доллароор Гашуунсухайт-Ганцмод боомт хүргэж өгөх нөхцөлөөр арилжаалсан. 

Мөн аравдугаар сарын 6-ны өдөр компанийн түүхэнд анх удаа БНХАУ-ын Цао Фейдянь боомт хүргэж өгөх нөхцөлөөр 6.4 мянган тонн баяжуулсан коксжих нүүрсний арилжааг амжилттай хийж БНХАУ-ын зах зээлийн гүнд нүүрс борлуулж эхэллээ.

Ийнхүү онцгой дэглэмийн хугацаанд нүүрсийг сорчлон борлуулахгүй байх бодлого баримталж 1/3 коксжих нүүрс болон эрчим хүчний нүүрсний борлуулалтыг нэмэгдүүлсэн. Хэдийгээр коксжих чанаргүй нүүрс борлуулсан ч компанийн ашиг, борлуулалт, экспорт, тээвэр бүгд өссөн үзүүлэлтэй байгаа нь компанийн бодлого үйл ажиллагаа, салбар хоорондын уялдаа холбоо сайжирсны үр дүн гэдгийг Бүрэн эрхт төлөөлөгчийн багийн ахлагч У.Бямбасүрэн Засгийн газарт тайлагналаа.

Есдүгээр сард хамгийн өндөр буюу 3,2 сая тонн нүүрс экспортлов 

Онцгой дэглэмийн хугацаанд компанийн экспортыг үе шаттайгаар нэмэгдүүлэв. “Чайна энержи” группийн ачилтыг 5 дахин, урт хугацааны гэрээт компанийн ачилтыг 30 хувиар, биржийн гэрээний ачилтыг 7 дахин, биржийн гэрээний экспортыг 8.1 дахин нэмэгдүүлж Монгол Улсад орж ирэх валютын мөнгөн урсгалыг нэмэгдүүлж ажиллалаа.

Түүнчлэн онцгой дэглэмийн хугацаанд нүүрсний экспортыг нэмэгдүүлж 2025 оны 07 дугаар сард 1.9 сая тонн, 08 дугаар сард 2.7 сая тонн, 09 дүгээр сард 3.2 сая тонн нүүрс Гашуунсухайт, Ханги боомтоор экспортоллоо. Есдүгээр сард экспортолсон нүүрсний хэмжээ “Эрдэнэс Тавантолгой” ХК-ийн бүх цаг үеийн хамгийн өндөр экспортын үзүүлэлт болсон нь онцгой дэглэмийн хугацаанд авч хэрэгжүүлсэн ажлын онцлох үр дүн байлаа.

Уурхайн техникийн бэлэн байдлыг 82 хувь болгож өсгөв

Онцгой дэглэм тогтоохоос өмнө уурхайн техникийн бэлэн байдал 56 хувьтай байсан бол техникийн бэлэн байдлыг 26 пунктээр нэмэгдүүлж 82 хувь болголоо. Техникийн бэлэн байдал нэмэгдсэнээр уулын ажлын бүтээмж нэмэгдэх, уурхайн үйл ажиллагаа тасралтгүй хэвийн явах боломж бүрдэж байгаа юм.

Мөн Онцгой дэглэмийн хугацаанд ТНАЛТ төсөлд үүссэн асуудлыг бүрэн шийдвэрлэж нүүрсний ачилтыг нэмэгдүүлэх боломжийг бүрдүүллээ. Мөн нүүрс баяжуулах үйлдвэрийн үйл ажиллагааг жигдрүүлэхтэй холбоотой холбогдох арга хэмжээг авч хэрэгжүүллээ.