Х.Нямбаатар өөрөө шувуу болов!

УИХ-ын Төсвийн байнгын хорооноос нийслэлийн төсвөөр зохион байгуулсан Хяналтын ерөнхий сонсголд оролцсон Хотын засаглал судлаач Л.Ану-Үжин нийслэлийн Засаг дарга асан Х.Нямбаатартай холбоотой шинэ мэдээлэл өгсөн. Тодруулбал, Х.Нямбаатарын Японы “Тоkyo tower”-ын 70 давхрын ресторанд хоол идэж байгаа бичлэгийг түүний чатаар хэн нэгэн явуулсан болохыг хэлсэн.

Нийслэлийн үе, үеийн Засаг нараас хамгийн их төсөв үрсэн нь Х.Нямбаатар. Түүнийг хотын даргаар ажилласан 3 жилийн хугацааны нийт төсөв ₮11 их наяд хүрсэн. Харамсалтай нь, нийслэлийн төсвийн алдагдал нь ₮2.4 их наяд.  Түүнчлэн Х.Нямбаатарын үед НЗДТГ-аас хэрэгжүүлж байсан 16 мега төслийн нийт төсөв нь $8.1 тэрбум буюу ₮28.9 их наяд. Эдгээр төслүүдийг гадаад бонд, гадаад зээл, нийслэлийн төсөв, төр хувийн хэвшлийн түншлэл, Хятадын буцалтгүй тусламжаар санхүүжүүлэхээр төлөвлөсөн хэдий ч гүйцэтгэл нь хангалтгүй. Энэ бүхэнд тайлбар хэлэх ёстой гол албан тушаалтан болох Х.Нямбаатар ажлаа өгсөн даруйд хэдийнэ хил давсан аж.

Тэрбээр Хууль зүй, дотоод хэргийн сайдаар ажиллаж байхдаа буюу 2023 оны 4 дүгээр сард Хотын ерөнхий менежер асан Т.Бадамжунайг Филиппин улсын Сэбү хотоос тус улсын хууль сахиулагчидтай хамтран баривчилж, Монголд авчирч байгаагаа хэвлэлүүдээр шууд дамжуулж байлаа. Тэгвэл өнөөдөр Т.Бадамжунай нь Монголд, Х.Нямбаатар өөрөө авлига, хулгайн хэрэгт нэр холбогдон албан тушаалаасаа огцроод зогсохгүй, хилийн чанадад шувуу болоод зугтсан бололтой. Ямартай ч тэрбээр Японы тансаг ресторанд зоог барьсан шигээ тарвалзаж яваа нь бичлэгтэйгээ баригдсан аж.

Х.Нямбаатараас гадна Л.Оюун-Эрдэнийн төрсөн ах “Херо” Б.Баатар, зөвлөх асан А.Амундра нар ч гадагшаа “шувуу” болоод нисчихсэн талаарх мэдээлэл ч олон нийтийн сүлжээнд цацагдсан билээ.