Каспийн тэнгист Ираны хөлөг онгоц руу халдлага үйлдсэн гэж Иран нь Украиныг буруутгав

Зеленский Иран улс Ойрхи Дорнод дахь агаарын цохилтоо чиглүүлэхийн тулд Оросын хиймэл дагуулын зургаас ашиглаж байна гэж мэдэгдэв. Дайны 1614 дэх өдөр болсон үйл явдлууд…

The Guardian (2026-07-26)

Иран улсын Гадаад хэргийн яам Бямба гаригт Каспийн тэнгист Ираны арилжааны хөлөг онгоц руу Украин халдлага үйлдсэнийг буруушааж, уг халдлагын улмаас нэг далайчин амь үрэгдэж, өөр нэг далайчин шархадсан гэж мэдэгдэв. Тегеран энэхүү халдлагыг түрэмгийлэл хэмээн нэрлэж, үндэсний ашиг сонирхол, аюулгүй байдлаа хамгаалахаа мэдэгдсэн байна. Мөн Иранд суугаа Украины дипломат төлөөлөгчийг дуудан уулзсан тухай Ираны төрийн хэвлэлүүд мэдээлэв. Украины дайны туршид Киев Москвагийн ашиглаж буй Иранд зохион бүтээсэн дронуудын эсрэг тэмцсээр ирсэн бөгөөд Ираны халдлагад өртсөн Ойрхи Дорнодын орнуудад дрон замаас нь сөнөөх туршлагаасаа хуваалцахыг санал болгож байсан юм.

Каспийн тэнгистэй хиллэдэг таван орны хоёр нь Иран болон Орос бөгөөд Орос улсын тэнгисийн цэргийн хүчирхэг флот энд байрладаг. Энэ нь тус дотоод тэнгисийг цэргийн хүчээ үзүүлэх талбар болон Ирантай холбогдох стратегийн чухал гүүр болгож байгаа юм. Иран улс хөлөг онгоц руу хийсэн халдлагыг буруушаасан явдал нь Украины Ерөнхийлөгч Володимир Зеленскийн хийсэн мэдэгдэлтэй цаг хугацааны хувьд давхцав. Зеленский Орос улс Ойрхи Дорнод дахь хиймэл дагуулын ажиглалтын мэдээллээ Иранд дамжуулж, тус бүс нутагт цохилт өгөх боломжийг олгож байна гэж мэдэгдсэн юм. Зеленский Бямба гаригт Х (хуучнаар Twitter) хуудсаараа дамжуулан Украин “Каспийн тэнгист алсын зайн цохилт өгөх замаар маш том үр дүнд хүрсэн, үүнд Ирантай холбоотой цэргийн ачаа тээвэрлэдэг хөлөг онгоцууд сөнөөгдсөн” гэж тэмдэглэжээ.

Түүнчлэн Зеленский Орос улс дөрвөн жил гаруй үргэлжилж буй энэхүү мөргөлдөөндөө Умард Солонгосын 30,000 цэргийг нэмж татан оролцуулахыг хүсэж байгаа бөгөөд тэднийг хүлээн авахаар хэдийнэ бэлтгэж эхэлснийг онцлов. Хоёр талын хамтын хамгаалалтын гэрээний дагуу Умард Солонгос 2024 онд Оросын Курск мужид ойролцоогоор 14,000 цэргээ илгээж, Украины хүчнийхний эхлүүлсэн томоохон довтолгоог буцаан цохиход Москвад тусалж байсан юм.

Зеленский оройн видео илгээлтдээ: -“Оросын Воронеж мужид Умард Солонгосын цэргүүдийг хүлээн авах бэлтгэл ажлыг зургадугаар сараас эхлэн хийж байна” гэж мэдэгдээд, коммунист дэглэмтэй тус улс Орост баллистик пуужингийн шинэ харвагч төхөөрөмжүүдийг нийлүүлэхээр бэлтгэж байгааг нэмж дурджээ.

Украины Запорожье мужийн Оросын хяналтад байгаа хэсэгт байрлах амралтын бааз руу хийсэн дроны халдлагын улмаас нийт 12 хүн үүний дотор таван хүүхэд амь үрэгдсэн гэж Оросоос томилогдсон орон нутгийн эрх баригчид Бямба гаригт мэдээлж, Украин энгийн иргэд рүү дайрлаа гэж буруутгав. Киев энэ талаар ямар нэг тайлбар өгөөгүй байна.

Энэ зуур Украины нийслэл Киев хот Ням гаригийн өглөө эрт Оросын пуужингийн халдлагад өртөж, унасан пуужингийн сэг нь доод тал нь гурван дүүрэгт гал түймэр тавьсан тухай Хотын дарга Виталий Кличко мэдэгдээд байна. Оросын хүчин нийслэл Киев рүү баллистик пуужингаар цохилт өгсөн гэж Украины Агаарын хүчин мэдээлэв. Гэвч агаарын аюулын дохио ойролцоогоор 50 минутын дараа цуцлагдаж, агаарын хүчин пуужингийн аюулын анхааруулгаа буцаан татжээ. Кличкогийн мэдээлснээр, төв дүүргийн олон давхар орон сууцны долоо болон наймдугаар давхарт гал гарсан байна. Хүний амь нас эрсэдсэн болон бэртэж гэмтсэн тухай мэдээлэл одоогоор ирээгүй байна.

Казахстаны Ерөнхийлөгч Касым-Жомарт Токаев Бямба гаригт хоёр тал мөргөлдөөнийг царцааж, хэлэлцээг дахин эхлүүлбэл Орос, Украины хооронд энхийн гэрээ байгуулагдах боломжтой гэж мэдэгджээ. Токаев эдгээр үгийг Сибирийн Омск хотод болсон Орос-Казахстаны форумын үеэр Владимир Путинтэй уулзахдаа хэлсэн байна. Кремлийн хэвлэлийн төлөөлөгч Дмитрий Песков ТАСС агентлагт мэдээлснээр Путин Токаевт Оросын Украинд явуулж буй цэргийн ажиллагааны нөхцөл байдлын талаар дэлгэрэнгүй танилцуулсан гэжээ.