"Монголын хөрөнгийн бирж" ХК "Тэнгэр капитал ҮЦК" ХХК-ийг зах зээл үүсгэгчээр бүртгэлээ

"Монголын хөрөнгийн бирж" ХК-ийн санаачилсан "Хөрөнгийн зах зээлийн хөрвөх чадварыг нэмэгдүүлэх тусгай хөтөлбөр" нь зах зээлийн оролцогч талуудыг дэмжлэгээр үр дүнгээ өгч эхэлжээ.

"Хөрөнгийн зах зээлийн хөрвөх чадварыг нэмэгдүүлэх тусгай хөтөлбөр"-ийн хүрээнд “Монголын хөрөнгийн бирж” ХК өнөөдөр (2026.06.12) "Тэнгэр Капитал ҮЦК" ХХК-ийг зах зээл үүсгэгчээр бүртгэж, хамтын ажиллагааны гэрээ байгууллаа.

Зах зээл үүсгэгч нь үнэт цаасны арилжаанд худалдан авах, худалдах үнийн саналыг тогтмол байршуулснаар захиалгын биелэлт болон зах зээлийн хөрвөх чадварыг сайжруулах, үнэ тогтоолтыг илүү бодитой, ил тод болгоход чиглэсэн үйл ажиллагаа явуулдаг юм байна.

"Тэнгэр Капитал ҮЦК" ХХК нь энэхүү тогтолцоонд нэгдсэн нь зах зээл үүсгэгчийн үйл ажиллагааг өргөжүүлэх чиглэлд хийгдэж буй ажлын нэг хэсэг болсон.

“Монголын хөрөнгийн бирж” ХК-иас хэрэгжүүлж буй "Хөрөнгийн зах зээлийн хөрвөх чадварыг нэмэгдүүлэх тусгай хөтөлбөр" нь зах зээл үүсгэгчийн тогтолцоог хөгжүүлэхээс гадна үнэт цаас зээлэх-зээлдүүлэх орчныг бүрдүүлэх, арилжааны зардлыг бууруулах, шинэ бүтээгдэхүүн, индекс, үйлчилгээ нэвтрүүлэх, зах зээлийн өгөгдөл, мэдээллийн хүртээмж, ил тод байдлыг сайжруулахад чиглэсэн хөтөлбөр аж.

Тус хөтөлбөрийн хүрээнд зах зээлийн оролцогчидтой хамтран хөрвөх чадварыг нэмэгдүүлэх чиглэлээр бодлогын болон зохицуулалтын шинэчлэлүүдийг үе шаттай хэрэгжүүлэхээр ажиллаж байгаа бөгөөд энэ нь Монголын хөрөнгийн зах зээлийн идэвхжил, ил тод байдал, хөрөнгө оруулагчдын оролцоог нэмэгдүүлэхэд чиглэж байгааг албаныхан онцоллоо.