“UBS манан” Монголын улс төрийг самрахаар шийдэв үү?

Монгол Улсын 34 дэх Ерөнхий сайд Г.Занданшатар өөрийн хүсэлтээр ажлаа өгч, МАН-ын дарга Н.Учрал 35 дахь Ерөнхий сайдаар томилогдоод ганцхан хонож байна. Үндсэн хуулийн дагуу УИХ-ын дарга асан, МАН-ын дарга Н.Учрал кабинетаа бүрдүүлж, Ерөнхийлөгчтэй зөвшилцөөд УИХ-д оруулах ёстой. 

Г.Занданшатарын Засгийн газарт ХҮН, ИЗНН-ын төлөөлөл багтсан бол Н.Учралын Засгийн газарт АН-ын бүлгийн зарим гишүүдээс хамтрах санал гаргасан байна. Тус намын бүлэг шинэ Засгийн бүтэц, бүрэлдэхүүний асуудлаар 2 хуваагдсан бололтой. Зарим нь Ерөнхий сайд Н.Учралд шахалт үзүүлж, 9 яамтай байх ёстой гэсэн шаардлага тавьж байгаа гэнэ.

Сүүлийн үед сөрөг хүчин дотоод сонгуулиас болж бүлэг дотроо зөрчилдөөнтэй, О.Цогтгэрэл, Х.Тэмүүжин нар бүлгийнхэнтэйгээ зөвшилцөлгүй шийдвэр гаргаж байгаад шүүмжлэлтэй хандах болсон байна.

Л.Оюун-Эрдэнийн Засгийн газар 16 яам, 23 сайдтай байсан бол Г.Занданшатарынх 16 яам 19 сайдтай ажилласан. Н.Учрал Засгийн газрын өмнөх бүтцийг төдийлэн өөрчлөхгүй гэсэн байр суурийг илэрхийлсэн. Тэгэхээр АН-ын шаардаж байгаа есөн суудал гэдэг бараг 50 хувь. 

Тэрчлэн “UBS” фракц өнгөрсөн намраас нэлээд идэвхжиж, АН талаас Ерөнхий прокурор асан Д.Дорлигжав, МАН-аас ХЗДХ-ийн сайд асан Ц.Нямдорж голлох үүрэгтэйгээр хоёр намаас улс төрд оролцох болжээ. О.Цогтгэрэл нь Д.Дорлигжавтай нэлээд ойр, дотно харилцаатай. Тэгвэл Ц.Нямдорж, Д.Дорлигжав хоёр хамаатнууд гэгддэг. УИХ-ын гишүүн Н.Алтанхуягийг Ерөнхий сайдаар ажиллаж байхад О.Цогтгэрэл нь зөвлөх нь байсан билээ.

Ц.Нямдорж өнгөрсөн ням гаригт болсон МАН-ын Бага хурлын үеэр УИХ-ын даргыг цөөнхид буюу Д.Амарбаясгалангийн талынханд өгөхийг илтэд шаардаж, сүрдүүлсэн. Тэгвэл Д.Дорлигжавын зүгээс Ардчилсан намд нөлөөлж, О.Цогтгэрэлийг УИХ-ын даргад С.Амарсайханыг дэмжихийг шахаж байгаа гэнэ.

С.Амарсайханы ах нь С.Отгонбаяр. УИХ-ын гишүүн Х.Баттулгын худ гэдгийг хэн хүнгүй мэднэ. Увсын фракцын найруулсан “хор” улс төрийн мануухай болсон Женкод боломж олгож, улмаар Монголын парламентын шийдвэрийг Оросын Думаас чиглүүлдэг болж  мэдэх эрсдэлтэй юм.

Б.ГЭРЭЛЭЭ