МАН-ын шинэ дүрэм: Ашиг сонирхлын нөлөөнд автвал улс төрийн дэмжлэг үзүүлэхгүй

Улс төрийн намын тухай хуулийн дагуу намууд бүтэц, зохион байгуулалт, Үндсэн дүрмээ шинэчилсэн. МАН-ын 31 дүгээр Их хурлаар Н.Учралыг намын даргаар сонгосон агаад Улсын Дээд шүүхийн нийт шүүгчдийн нэгдүгээр сарын 9-ны хуралдаанаар түүнийг албан ёсоор бүртгэж авсан билээ. Мөн Улсын Дээд шүүх тус намын шинэ дүрмийг бүртгэж авсан юм.

МАН-ын шинэ дүрмийн онцлох заалтуудаас тоймлон хүргэе.

1. МАН нь социал демократ үзэл баримтлал бүхий улс төрийн байгууллага мөн.

2. МАН нь Үндсэн хууль, бусад хуулийг чандлан сахиж, хуулийн хүрээнд энэхүү дүрмийг удирдлага болгон ажиллана.

3. Намын бүх шатны байгууллага энэхүү дүрэмд заасны дагуу улс төрийн аливаа шийдвэрийг албан ёсны хуралдаанаараа хэлэлцэн хамтын зарчмаар гаргах ба хурал нь олонх ирснээр хүчинтэйд тооцогдоно.

4. Намын бүх шатны сонгуульт байгууллагад 40-өөс доошгүй хувь нь аль нэг хүйсийн төлөөлөл байна. Нэр дэвшүүлэлт, санал хураалтыг энэ шаардлага, хувь хэмжээнд нийцүүлэн зохион байгуулна.

НАМЫН ГИШҮҮНИЙ ЭРХ ҮҮРЭГ

1. Намын үзэл баримтлал, бодлого боловсруулах, хэлэлцэхэд болон намаас явуулж буй үйл ажиллагаанд тэгш эрхтэй оролцоно.

2. Улс орны болон намын дотоод амьдралын асуудлаар санал тавьж хариу авах, шүүмжлэх, мэдээлэл өгөхийг шаардах эрхтэй.

3. Гишүүдийн төлсөн татвар, өргөсөн хандив, намын сан хөмрөгийн зарцуулалтын тайланг сонсох эрхтэй.

4. Намын эв нэгдлийг хамгаалж, намын нэр хүндийг гутаасан аливаа үйлдэл гаргахгүй байх үүрэгтэй.

5. Намын эрх ашигт үл нийцэх улс төрийн үйл ажиллагааг шүүмжлэн няцаах үүрэгтэй.

6. Намын нэрийн өмнөөс сонгогдож томилогдсон албан тушаалтан бүр хуулийг чандлан сахиж, ашиг сонирхлын явцуу бүлгийн нөлөөнд автахгүй байх;

7. Намын Удирдах зөвлөл болон бүх шатны намын удирдах байгууллагын шийдвэрийг зөрчихгүй байх;

8. Намын эрх ашиг, албан ёсны шийдвэрт хүндэтгэлтэй хандах;

9.  Намын дотоод асуудлаар олон нийтэд хандаж, намын эв нэгдэл, үйл ажиллагаанд сөрөг нөлөө үзүүлэхүйц үйлдэл хийхгүй байх;

10. Эдгээрийг зөрчсөн тохиолдолд улс төрийн тодорхой дэмжлэг үзүүлэхээс татгалзана.

УЛС ТӨРИЙН ЯМАР ДЭМЖЛЭГ ҮЗҮҮЛЭХГҮЙ ВЭ?

1. Намаас сонгогдож, томилогддог аливаа албан тушаалд нэр дэвшүүлэхээс татгалзана.

2. Хуульд өөрөөр заагаагүй бол одоо ажиллаж байгаа албан тушаалд үргэлжлүүлэн ажиллуулахаас татгалзана.

3. Намын гишүүн нь авлига, албан тушаалын гэмт хэрэг үйлдсэн нь шүүхээр тогтоогдсон бол намын удирдах байгууллагад сонгогдох, бүх шатны байгууллагад сонгууль намын нэрийн өмнөөс нэр дэвших эрх эдлэхгүй.

ЯМАР ТОХИОЛДОЛД НАМЫН ГИШҮҮНД САХИЛГЫН ЗӨРЧИЛ ТООЦОХ, ХАРИУЦЛАГА ХҮЛЭЭЛГЭХ ВЭ!

1. МАН-ын гишүүнийг хасах тухай асуудлыг Хяналтын ерөнхий хороо нь Бага хурлаас баталсан маргаан шийдвэрлэх журмын дагуу хуралдаж шийдвэрлэнэ.

2. Намаас УИХ болон ИТХ-ын сонгуульд нэр дэвшигчтэй зэрэгцэн бие даан болон өөр нам эвслээс нэр дэвшсэн, намын болон намын нэр дэвшигчийн эсрэг сурталчилгаа хийвэл;

3.  Намаас сонгогдсон болон томилогдон төрийн өндөр албан тушаал эрхлэж байх хугацаандаа авлига, албан тушаалын гэмт хэрэг үйлдсэн болох нь шүүхийн шийдвэрээр тогтоогдсон бол;

4. Намын бүх шатны сонгуульд нэр дэвшигч нь санал худалдаж авах үйлдэл гаргасан;

5. Намын гишүүний эсрэг худал мэдээлэл тараасан, гишүүний нэр хүндэд халдах зорилгоор өөр этгээдтэй хуйвалдсан, үгсэн тохиролцсон тохиолдолд сахилгын зөрчил тооцно.

6. Намын дүрэм болон гишүүний ёс зүйн хэм хэмжээг зөрчсөн үйлдэл, үйл ажиллагааг сахилгын зөрчил тооцох эсэхийг гагцхүү намын Хяналтын ерөнхий хороо тогтооно.

НАМЫН БАГА ХУРАЛ ЯМАР ҮҮРЭГТЭЙ ВЭ?

1. УИХ-ын сонгуульд оролцох сонгуулийн мөрийн хөтөлбөрийг хэлэлцэж батлах, МАН-аас УИХ болон Ерөнхийлөгчийн сонгуульд нэр дэвшүүлэх;

2. УИХ-ын сонгуулийн үр дүнд “Эвсэл”-ийн Засгийн газар байгуулах шаардлага гарвал энэ тухай хэлэлцэж, шийдвэр гаргах;

3. Монгол Улсын Ерөнхий сайдаар томилуулах санал гаргах;

4. Намын Их хурлын чөлөөт цагт намын даргын орон гарвал Бага хуралд оролцсон гишүүдийн гуравны хоёрын саналаар шинэ даргыг сонгох, хэрэв аль ч нэр дэвшигч гуравны хоёрын дэмжлэг аваагүй бол намын Их хурлаар шийдвэрлүүлэх;

5. Намын Ерөнхий нарийн бичгийн дарга, нарийн бичгийн дарга, Удирдах зөвлөлийг сонгох үүрэгтэй.

6. Намын Бага хурлын гишүүдийн дөрөвний нэгийн дэмжлэг хүлээвэл намд жигүүр байгуулахыг зөвшөөрнө.

7. Жигүүр нь намын нэгдэл, зохион байгуулалтад хохирол учруулах үйл ажиллагаа явуулбал Бага хурлаас татан буулгана.

МАН-ын шинэ дүрмийн дэлгэрэнгүйг эндээс уншина уу.