Такаичи парламентын ээлжит бус сонгуульд тасархай ялалт байгуулав!

Ерөнхий сайд Санаэ Такаичигийн зарласан ээлжит бус сонгуулийн санал хураалт дуусаж, урьдчилсан байдлаар түүний тэргүүлдэг Либерал ардчилсан нам (ЛАН) үнэмлэхүй ялалт байгуулжээ.

Японы анхны эмэгтэй Ерөнхий сайд тэрбээр намын дарга болоод ердөө дөрвөн сарын дараа олон нийтээс өөрийгөө дэмжих тодорхой мандат хүсэж байгаа нь энэ юм.

Түүний энэхүү амжилт нь авлигын дуулиан, өртгийн өсөлтөөс болж парламентад олонхын суудлаа алдсан өмнөх хоёр удирдагчаас эрс ялгаатай дүр зургийг харуулж байна.

Дайны дараах түүхийн ихэнх хугацаанд ЛАН тэргүүтэй эвсэл Японыг удирдсаар ирсэн. ЛАН парламентын хоёр танхимд олонхын суудлаа алдаж, Комейто намтай байгуулсан олон арван жилийн эвсэл нь задарсны дараах энэхүү алхмыг зарим улстөрчид "мөрийтэй тоглоом”-той зүйрлэж байв. Аливаа улсын улс төр угаас бооцоот тоглоомтой адил. Ялахын төлөө нэр төр, албан тушаал бүхнээрээ дэнчин тавьдаг нь бичигдээгүй хууль.

Парламентын ээлжит бус сонгуульд ЛАН үнэмлэхгүй ялалт байгуулсан нь сайндаа биш. Санаэ Такаичийн хувийн нэр хүнд намдаа тасархай ялалт авчирсан байна. Түүний засгийн газрын дэмжлэгийн түвшин ихэвчлэн 70%-иас дээш байсаар ирсэн. ЛАН-ын Японы Инновацын намтай байгуулсан одоогийн эвсэл сонгуулийн урьдчилсан дүнгээр доод танхимын 465 суудлаас 300 хүртэлх суудлыг авах магадлалтай байна. “Нью Йорк таймс” нь ЛАН парламентад 234 суудал баталгаатай авсан гэж бичжээ. Харин “Japantimes” Такаичи  урьдчилсан байдлаар ээлжит бус сонгуульд  274-328 суудал авсан гэж бичсэн байна. Японы сонгогчид ЛАН энэ удаагийн ээлжит бус сонгуульд түүхэн ялалт байгуулна гэсэн хүлээлттэй байгаа аж.

Токио хотын сонгогч Рицуко Ниномия “BBC”-д ярихдаа "Бид инфляцгүй амьдарч дассан болохоор хүмүүс амьдралаа илүү сайхан, тав тухтай байлгахыг хүсэж байна. Бидэнд богино хугацааны засвар бус, урт хугацааны шийдэл хэрэгтэй байна" гэжээ.

Ялангуяа амьжиргааны өртөг өсөхийн хэрээр Японы сонгогчид ЛАН-тай холбоотой сүүлийн үеийн улс төрийн дуулиануудад бухимдалтай хандах болсон байна.

"Орон сууц маш үнэтэй байна" гэж Руми Хаяама бухимдангүй өгүүлээд. "Хүү маань томорч байгаа тул бидэнд илүү том байр хэрэгтэй байгаа ч бид боломжийн ажил хийдэг хэрнээ үнийг нь дийлэхээргүй байна. Үнэ улам өсөж, Японд амьдрахад хэцүү болж байна. Өмнө нь ийм байгаагүй" гэж хэвлэлийнхэнд ярьжээ.

Такаичигийн урам зориг, төсвийн зарцуулалтыг нэмэгдүүлэх популист амлалтууд болон үндсэрхэг үзэл нь зарим сонгогчдыг идэвхжүүлсэн бололтой. Гэвч шүүмжлэгчид, тэр дундаа бизнес эрхлэгчид түүний инфляц нэмэгдүүлсэн амлалт нь Японы удаашралтай эдийн засгийг сэргээж чадна гэдэгт эргэлзэж байгаа аж. Тус улсын засгийн газрын өр хөгжингүй орнуудын дунд хамгийн өндөрт тооцогдож байгаа юм. Мөн цагаачлалын талаарх консерватив байр суурь нь ажиллах хүчний хомсдолд ороод буй, хөгширч байгаа тус улсад нэмэр болохгүй гэж тэд санаа зовж байна.

"Энэ сонгууль залуу үеийнхэн, бидэн шиг хүмүүсийн хувьд илүү чухал гэж би бодож байна" гэж Даниел Хаяама хэлээд, өвлийн хүйтэн саналаа өгөхийг хүссэн залууст саад болоогүйг онцолжээ.

Сонгуулийн санал хураалтын өдөр Япон даяар иргэд цас орж байсан ч иргэд нь өвлийн дунд сарын санал хураалтад идэвхтэй оролцсон байна.

Ням гаригийн өглөө галт тэрэгний 37 шугам, гатлага онгоцны 58 чиглэл хаагдаж, 54 нислэг цуцлагдсан гэж Японы тээврийн яамнаас мэдээлсэн. Гэсэн хэдий ч хүмүүс дүн өвлийн хүйтнээр санал өгөхөөс цааргалаагүй аж.

Такаичи болон ЛАН энэ удаад өмнөхөөсөө илүү нэгдмэл сөрөг хүчинтэй тулгарсан. ЛАН-ын эвслийн түнш асан Комейто нам Японы Үндсэн хуульт ардчилсан намтай нэгдэж, доод танхим дахь хамгийн том сөрөг хүчний эвслийг байгуулжээ.

Такаичи Дональд Трамптай дотно харилцаа тогтоохыг хичээсэн бөгөөд Трамп түүнийг олон нийтэд ил тод дэмжсэн нь АНУ-ын ерөнхийлөгчийн хувьд ер бусын алхам байв. Тэд хоёулаа Япон улс батлан хамгаалахад илүү их мөнгө зарцуулах ёстой гэдэгт санал нэгдэж байгаа бололтой.

Сонгогч Юко Сакай "Ерөнхийлөгч Трампын хийж буй үйлдлүүд болон үндэсний батлан хамгаалахын асуудлуудад би санаа зовж байна. Үүнийг шийдвэрлэх мөнгө хаанаас гарахыг сайн мэдэхгүй байна. Тиймээс төсвийн зардлыг батлан хамгаалах болон иргэдийн амьдрал хооронд тэнцвэржүүлэх нь миний хувьд хамгийн том асуудал" гэж ярьжээ.